ഒരുകാലത്ത് മലയാള സിനിമയിലെ ആക്ഷൻ ഹീറോ ആയിരുന്നു ബാബു ആന്റണി. നടി ചാർമിളയുമായുള്ള വിവാദവും വിവാഹവും കാരണം സിനിമയിൽ നിന്നും ബാബു ആന്റണി നീണ്ട ഇടവേള എടുത്തിരുന്നു. ഇപ്പോഴിതാ, എബ്രിഡ് ഷൈൻ സംവിധാനം ചെയ്യുന്ന കായംകുളം കൊച്ചുണ്ണിയെന്ന് നിവിൻ പോളി ചിത്രത്തിലൂടെ ബാബു ആന്റണി വീണ്ടും മലയാള സിനിമയിലേക്ക് തിരിച്ചു വരികയാണ്.

സൂപ്പര്‍ ആക്ഷന്‍ ഹിറോ ആയി തിളങ്ങിയ താൻ പരാജയത്തിന്റെ പടുകുഴിയിലേയ്ക്ക് വീഴാൻ കാരണം ഒരു സ്ത്രീയാണെന്ന് ബാബു ആന്റണി മനോരമ ഓൺലൈനു നൽകിയ അഭിമുഖത്തിൽ പറഞ്ഞു. കഴിഞ്ഞ 20 വർഷമായി മലയാള സിനിമയെ അറിയാവുന്നവർക്ക് ആ സ്ത്രീ ആരാണെന്ന് അറിയാമെന്നും ബാബു ആന്റണി പറയുന്നു.

തനിക്കെതിരെ പല കള്ളക്കഥകളും അവർ പറഞ്ഞുണ്ടാക്കി. അതൊക്കെ അന്നുള്ളവർ വിശ്വസിച്ചു. ജനങ്ങൾക്കിടയിൽ തന്റെ പ്രതിച്ഛായക്ക് കോട്ടം തട്ടിയെന്ന് സംവിധായകരും നിർമാതാക്കളും പറഞ്ഞു. അങ്ങനെ പതിയെ പതിയെ സിനിമയിൽ നിന്നും പുറത്താവുകയായിരുന്നു.

ഇടവേളയ്ക്ക് ശേഷം വീണ്ടും സജീവമാകാന്‍ ശ്രമിച്ചപ്പോള്‍ അവര്‍ വീണ്ടും രംഗത്തിറങ്ങിയിരിക്കുകയാണ്. എന്റെ കുടുംബ ജീവിതം പോലും ഇല്ലാതാക്കാന്‍ ശ്രമം നടക്കുന്നുണ്ട്. എനിക്കെതിരായി ചെയ്യുന്നതിനെല്ലാം ഒരുനാള്‍ അവർക്ക് കണക്ക് പറയേണ്ടി വരും. അന്ന് അവര്‍ തന്റെ കാലില്‍ വീണ് മാപ്പു ചോദിക്കുന്നത് എല്ലാവര്‍ക്കും കാണാനാകുമെന്നും ബാബു ആന്റണി പറയുന്നു.