ഡൽഹി മുഖ്യമന്ത്രി അരവിന്ദ് കേജ്‌രിവാളിനെതിരെ വീണ്ടും ആക്രമണം. വാഹന നിയന്ത്രണം സംബന്ധിച്ച വാർത്താ സമ്മേളനത്തിനിടെയാണ് കേജ്‌രിവാളിനെതിരെ ഒരാള്‍ ഷൂ വലിച്ചെറിഞ്ഞത്. എന്നാല്‍ ഷൂ കേജ്‌രിവാളിന്റെ ശരീരത്തിൽ കൊണ്ടില്ല. ആം ആദ്മി സേനാംഗമാണെന്ന് അവകാശപ്പെട്ടയാളാണ് ഷൂ ഏറിഞ്ഞത്. പ്രതിയെ പൊലീസ് പിടികൂടി.

അഴിമതിക്കെതിരെ നടപടി എടുക്കുമെന്ന കേജ്‍രിവാളിന്റെ പ്രഖ്യാപനങ്ങളൊന്നും നടപ്പായില്ലെന്ന് ആരോപിച്ചാണ് ഷൂയെറിഞ്ഞത്. ഉടന്‍‌തന്നെ പ്രവർത്തകരും സുരക്ഷാ ഉദ്യോഗസ്ഥരും ചേർന്ന് ഇയാളെ പിടികൂടി.

തുടര്‍ച്ചയായുള്ള ആക്രമണങ്ങളുടെ പാശ്ചാത്തലത്തില്‍ കേജ്‌രിവാളിന് കനത്ത സുരക്ഷ ഏർപ്പെടുത്താൻ പൊലീസ് തീരുമാനിച്ചിരുന്നുവെങ്കിലും അദ്ദേഹമത് നിരസിക്കുകയായിരുന്നു. ഈ വര്‍ഷം മാത്രം ഇത് രണ്ടാം തവണയാണ് കേജ്‌രിവാളിനെതിരെ ആക്രമണം നടക്കുന്നത്.