Kerala Weather: മഴ തുടരും, ആറ് ജില്ലകളില് യെല്ലോ അലര്ട്ട്
അടുത്ത നാല് ദിവസത്തിനുള്ളില് രാജ്യത്ത് നിന്ന് കാലവര്ഷം പൂര്ണ്ണമായും വിടവാങ്ങാന് സാധ്യത
Kerala Weather: സംസ്ഥാനത്ത് മഴ തുടരുമെന്ന് കേന്ദ്ര കാലാവസ്ഥ വകുപ്പ്. ഇന്ന് ആറ് ജില്ലകളില് യെല്ലോ അലര്ട്ട്. ഇടുക്കി, പാലക്കാട്, മലപ്പുറം, കോഴിക്കോട്, വയനാട്, കണ്ണൂര് ജില്ലകളിലാണ് ഒറ്റപ്പെട്ട ശക്തമായ മഴയ്ക്കു സാധ്യതയുള്ള യെല്ലോ അലര്ട്ട് പുറപ്പെടുവിച്ചിരിക്കുന്നത്. ഇടിമിന്നലോടു കൂടിയ മഴയാണ് പ്രതീക്ഷിക്കുന്നത്.
അടുത്ത നാല് ദിവസത്തിനുള്ളില് രാജ്യത്ത് നിന്ന് കാലവര്ഷം പൂര്ണ്ണമായും വിടവാങ്ങാന് സാധ്യത. അതെ ദിവസങ്ങളില് തന്നെ തെക്കേ ഇന്ത്യയില് തുലാവര്ഷം ആരംഭിക്കാനും സാധ്യത. മധ്യ കിഴക്കന് അറബിക്കടലില് ശക്തി കൂടിയ ന്യുനമര്ദ്ദം സ്ഥിതി ചെയ്യുന്നു. പടിഞ്ഞാറ് - വടക്ക് പടിഞ്ഞാറ് ദിശയില് സഞ്ചരിച്ചു അടുത്ത 12 മണിക്കൂറിനുള്ളില് മധ്യ അറബിക്കടലില് തീവ്ര ന്യുനമര്ദ്ദമായി ശക്തി പ്രാപിക്കാന് സാധ്യത.
വടക്കന് തമിഴ്നാടിനു മുകളില് ചക്രവാതച്ചുഴി സ്ഥിതിചെയ്യുന്നു. തെക്ക് കിഴക്കന് ബംഗാള് ഉള്ക്കടലിലെ ചക്രവാതച്ചുഴി നാളെയോടെ പടിഞ്ഞാറന് ബംഗാള് ഉള്ക്കടലിന്റെ മധ്യ ഭാഗത്തു ന്യുനമര്ദ്ദമായി ശക്തി പ്രാപിക്കാന് സാധ്യത. തുടര്ന്നു ശക്തി പ്രാപിച്ച് വടക്കന് തമിഴ്നാട്, പുതുച്ചേരി, തെക്കന് ആന്ധ്രാ തീരത്തേക്ക് നീങ്ങാന് സാധ്യത. കേരളത്തില് അടുത്ത ഒരാഴ്ച വ്യാപകമായി നേരിയ / ഇടത്തരം മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.
