ദുല്‍ഖര്‍ സല്‍മാന്‍-ഉണ്ണി മുകുന്ദന്‍ ചിത്രം 'വിക്രമാദിത്യന്‍'ന് രണ്ടാം ഭാഗം വരുമോ ? അങ്ങനെയൊരു സൂചന നല്‍കിക്കൊണ്ട് തന്നെയാണ് സിനിമ അവസാനിച്ചത്. 2014ല്‍ പുറത്തിറങ്ങിയ ചിത്രം പത്തു വര്‍ഷങ്ങള്‍ക്കിപ്പുറവും പ്രേക്ഷകന് അതേ പുതുമ നിലനിര്‍ത്തുന്നു. സിനിമയ്ക്ക് രണ്ടാം ഭാഗം ഉണ്ടാകുമെന്ന് നേരത്തെ സംവിധായകന്‍ ലാല്‍ ജോസ് വെളിപ്പെടുത്തിയിരുന്നു. ഇപ്പോഴിതാ സിനിമയുടെ രണ്ടാം ഭാഗം എടുക്കാനുള്ള ആഗ്രഹത്തെക്കുറിച്ച് ഒരിക്കല്‍ കൂടി തുറന്നു പറഞ്ഞിരിക്കുകയാണ് സംവിധായകന്‍.

എന്നാല്‍ സിനിമ ഉടനെ ഉണ്ടാകുമോ എന്ന് ചോദിച്ചാല്‍ തനിക്ക് അറിയില്ലെന്നാണ് ലാല്‍ ജോസ് പറയുന്നത്. സിനിമയുടെ കഥ ഏകദേശം ആയിട്ടുണ്ടെന്നും ദുല്‍ഖറിനോടും ഉണ്ണി മുകുന്ദനോടും കഥ സൂചിപ്പിച്ചിട്ടുണ്ടെന്നും ദുല്‍ഖര്‍ ഒക്കെ പറഞ്ഞാല്‍ സിനിമ സംഭവിക്കും എന്നും ലാല്‍ ജോസ് അഭിമുഖത്തിനിടയില്‍ പറഞ്ഞു.

'ഉടനെ ഉണ്ടാകുമോ എന്ന് ചോദിച്ചാല്‍ എനിക്കറിയില്ല. പക്ഷേ അങ്ങനെ ഒരു പ്രോജക്ട് ഉണ്ട്. ഞങ്ങള്‍ അത് ആഗ്രഹിക്കുന്നുണ്ട്. അതിന്റെ കഥയുടെ ഏകദേശം ഐഡിയ ഒക്കെ ആയിട്ടുണ്ട്. ഉണ്ണി മുകുന്ദനോട് സൂചിപ്പിച്ചിട്ടുണ്ട്. ദുല്‍ഖറിനോടും സൂചിപ്പിച്ചിട്ടുണ്ട്. ദുല്‍ഖര്‍ ആയിട്ട് ഇനിയൊരു സിറ്റിങ് ഉണ്ട്. കഥ വിശദമായി പറയണം. അദ്ദേഹം അത് ഓക്കേ പറഞ്ഞാല്‍ ആ പ്രോജക്ട് ഓണ്‍ ആകും' ലാല്‍ജോസ് പറഞ്ഞു.

തിരക്കഥാകൃത്ത് ഇഖ്ബാല്‍ കുറ്റിപ്പുറം ലാല്‍ജോസ് കൂട്ടുകെട്ടില്‍ 2014-ല്‍ പുറത്തിറങ്ങിയ ചിത്രമാണ് 'വിക്രമാദിത്യന്‍'.ദുല്‍ഖര്‍ സല്‍മാന്‍, ഉണ്ണി മുകുന്ദന്‍, നമിത പ്രമോദ് എന്നിവര്‍ പ്രധാന വേഷങ്ങളില്‍ ചിത്രത്തില്‍ നിവിന്‍ പോളിയും അതിഥി വേഷത്തില്‍ എത്തിയിരുന്നു.