വരാനിരിക്കുന്ന മമ്മൂട്ടി ചിത്രങ്ങളിൽ ഏറ്റവും പ്രതീക്ഷ ഉണർത്തുന്ന ചിത്രമാണ് മധുര രാജ. രാജയുടെ വൺ‌മാൻ ഷോയ്ക്കായുള്ള കാത്തിരിപ്പിലാണ് ആരാധകർ. വൈശാഖ് ഒരുക്കിയ പോക്കിരിരാജയുടെ രണ്ടാം പതിപ്പാണ് മധുരരാജ. ചിത്രത്തിന്റെ ഫസ്റ്റ് ലുക്കുകളും, മോഷന്‍ പോസ്റ്ററും ഒക്കെ നേരത്തെ ട്രെന്‍ഡ് ആയിരുന്നു.

ഇപ്പോള്‍ പുറത്തു വന്ന ഒരു പുതിയ സ്റ്റില്‍ ആണ് വൈറല്‍ ആകുന്നത്. നെടുമുടി വേണുവും മമ്മൂട്ടിയും ഒരുമിച്ച്‌ നില്‍ക്കുന് ഒരു ചിത്രം. 70 വയസുള്ള അച്ഛനും 67 വയസുള്ള മകനും എന്ന തലക്കെട്ടോട് കൂടിയാണ് ഈ സ്റ്റില്‍ വൈറല്‍ ആകുന്നത്.

മമ്മൂട്ടിയുടെ കരിയറിലെ ഏറ്റവും ചിലവേറിയ ചിത്രം കൂടിയാണ് മധുരരാജ. പുലിമുരുകന് ശേഷം വൈശാഖ്, ഉദയ് കൃഷ്ണ, പീറ്റർ ഹെയ്ൻ എന്നിവർ വീണ്ടുമൊരുമിക്കുകയാണ് എന്ന പ്രത്യേകതയും ചിത്രത്തിനുണ്ട്. കേരളത്തിലെയും തമിഴ് നാട്ടിലേയും ലൊക്കേഷനുകളിലായി 120 ലേറെ ദിവസങ്ങൾ നീണ്ടു നിൽക്കുന്ന 3 ഷെഡ്യൂളായാണ് ചിത്രീകരണം നടന്നത്.

തമിഴ് നടൻ ജയ് ഒരു മുഴുനീള കഥാപാത്രം കൈകാര്യം ചെയ്യുന്നതിനോടൊപ്പം ജഗപതി ബാബു വില്ലൻ വേഷത്തില്‍ ചിത്രത്തിലെത്തുന്നു. മുരുകൻ കാട്ടാകടയും ഹരിനാരായണനും എഴുതിയ വരികൾക്ക് ഗോപി സുന്ദർ ആണ് സംഗീതം. ജോസഫ് നെല്ലിക്കൻ കലാസംവിധാനവും രഞ്ജിത് അമ്പാടി മേക്കപ്പും നിർവഹിക്കുന്നു.