പ്രധാനമന്ത്രി നരേന്ദ്രമോദി, അമിത് ഷാ തുടങ്ങിയ കേന്ദ്രനേതാക്കൾക്കും ഇന്ത്യൻ നായകൻ വിരാട് കോഹ്ലിക്കും പാക് ഭീകരസംഘടനയുടെ ഭീഷണി. കേരളത്തിൽ നിന്നാണ് ഭീഷണി പോയിരിക്കുന്നതെന്ന് റിപ്പോർട്ട്. ‘ഓൾ ഇന്ത്യ ലഷ്കറെ തോയ്ബ ഉന്നതാധികാരസമിതി, കോഴിക്കോട്’ എന്ന വിലാസത്തിൽ നിന്നാണ് ദേശീയ അന്വേഷണ ഏജൻസിയായ എൻ ഐ എക്കും പ്രമുഖരുടെ പേരെഴുതിയ ഭീഷണിക്കത്ത് അയച്ചിരിക്കുന്നത്.

നരേന്ദ്രമോദി, അമിത് ഷാ, രാഷ്ട്രപതി രാം‌നാഥ് കോവിന്ദ്, നിർമല സീതാരാമൻ, വിരാട് കോഹ്ലി എന്നിവരെയാണ് ഇവർ ലക്ഷ്യം വെച്ചിരിക്കുന്നത്. മന്ത്രിമാരും നേതാക്കൾക്കും ഭീഷണികൾ വരാറുണ്ടെങ്കിലും ഒരു ക്രിക്കറ്റ് താരം ഈ ലിസ്റ്റിൽ വരുന്നത് ഇതാദ്യമാണ്.

ഇന്ത്യൻ സൈന്യം കൊലപ്പെടുത്തിയ ഭീകരരുടെ മരണത്തിനു പ്രതികാരം ചെയ്യുക എന്നതാണ് ഈ സംഘടനയുടെ ലക്ഷ്യം. ഭീഷണി വന്നിരിക്കുന്ന ഏവർക്കും ശക്തമായ സുരക്ഷയാണ് ഒരുക്കിയിരിക്കുന്നത്.