ടെസ്റ്റ് ക്രിക്കറ്റിലെ അത്യപൂര്‍വ റെക്കോര്‍ഡ് നേട്ടം സ്വന്തമാക്കി ശ്രീലങ്കന്‍ താരം കാമിന്‍ഡു മെന്‍ഡിസ്. ന്യൂസിലന്‍ഡിനെതിരായ രണ്ടാം ക്രിക്കറ്റ് ടെസ്റ്റിലും അര്‍ധസെഞ്ചുറി നേടിയതോടെ തന്റെ അരങ്ങേറ്റ ടെസ്റ്റ് മത്സരം മുതല്‍ തുടര്‍ച്ചയായി 8 മത്സരങ്ങളിലും അര്‍ധസെഞ്ചുറി നേടുന്ന ആദ്യതാരമെന്ന റെക്കോര്‍ഡാണ് മെന്‍ഡിസ് സ്വന്തമാക്കിയത്.

ന്യൂസിലന്‍ഡിനെതിരായ രണ്ടാം ടെസ്റ്റിന്റെ ആദ്യ ദിനം അവസാനിക്കുമ്പോള്‍ പുറത്താകാതെ 51 റണ്‍സുമായി താരം ക്രീസിലുണ്ട്. സെഞ്ചുറി നേടിയ ദിനേഷ് ചാണ്ടിമാലിന്റെയും ക്യാപ്റ്റന്‍ എയ്ഞ്ചലോ മാത്യൂസിന്റെയും(78*) പ്രകടനങ്ങളുടെ മികവില്‍ ആദ്യദിനം 3 വിക്കറ്റ് നഷ്ടത്തില്‍ 306 റണ്‍സാണ് ശ്രീലങ്കയെടുത്തത്.