ജനപ്രിയ റിയാലിറ്റി ഷോയായ ബിഗ്‌ബോസിന്റെ തമിഴ് പതിപ്പിന്റെ അവതാരക സ്ഥാനത്ത് നിന്നും പിന്മാറി ചലച്ചിത്രതാരം കമല്‍ഹാസന്‍. 2017ല്‍ ആരംഭിച്ച ആദ്യ സീസണ്‍ മുതല്‍ ഈ വര്‍ഷം ജനുവരിയില്‍ അവസാനിച്ച ഏഴാം സീസണ്‍ വരെ കമല്‍ഹാസന്‍ തന്നെയായിരുന്നു ഷോയുടെ അവതാരകനായി എത്തിയത്. സോഷ്യല്‍ മീഡിയയിലൂടെ പുറത്തിറക്കിയ കത്തിലൂടെയാണ് ആരാധകരെ കമല്‍ ഇക്കാര്യം അറിയിച്ചത്.

താത്കാലികമായാണ് ഇടവേളയെടുക്കുന്നതെന്നും എട്ടാം സീസണില്‍ തന്റെ സാന്നിധ്യം ഉണ്ടാകില്ലെന്നും കമല്‍ഹാസന്‍ പറയുന്നു. ഏറെ ഹൃദയഭാരത്തോടെയാണ് ഇക്കാര്യം നിങ്ങളെ അറിയിക്കുന്നത്. സിനിമാ തിരക്കുകള്‍ കാരണം വരാനിരിക്കുന്ന ബിഗ്‌ബോസ് സീസണില്‍ അവതാരകനെന്ന നിലയില്‍ എത്താന്‍ എനിക്ക് സാധിക്കില്ല. ബിഗ്‌ബോസ് അവതാരകനെന്ന നിലയില്‍ ലഭിച്ച സ്‌നേഹത്തിന് പ്രേക്ഷകര്‍ക്ക് നന്ദി പറയുന്നതായും ബിഗ്‌ബോസ് തനിക്ക് വലിയ പഠനവിഷയമായിരുന്നുവെന്നും കമല്‍ഹാസന്‍ കുറിച്ചു.

വിക്രം എന്ന സിനിമയിലൂടെ തമിഴകത്ത് ശക്തമായ തിരിച്ചുവരവ് നടത്തിയ കമല്‍ഹാസന്റെ പുറത്തിറങ്ങിയ അവസാന സിനിമ ഇന്ത്യന്‍ 2 ആണ്. ഇന്ത്യന്‍ 3, മണിരത്‌നം സംവിധാനം ചെയ്യുന്ന തഗ് ലൈഫ്, കല്‍കി 2898 എ ഡി രണ്ടാം ഭാഗം എന്നിവയാണ് കമലിന്റേതായി ഇനി പുറത്തുവരാനുള്ള സിനിമകള്‍.