നടിയെ ആക്രമിച്ച കേസിലെ പ്രതി നടൻ ദിലീപ് ഇന്ന് ദുബായിലേക്ക് പോകും. കോടതിയുടെ പ്രത്യേക അനുമതിയോടു കൂടിയാണ് താരം ദുബായിലേക്ക് തിരിക്കുന്നത്. ദിലീപും നാദിർഷായും ഒരുമിച്ച് തുറക്കുന്ന 'ദേ പുട്ട്' റെസ്റ്റൊറന്റിന്റെ ഉദ്ഘാടനത്തിനായാ താരം ദുബായിലേക്ക് പോകുന്നത്.

എന്നാൽ, ദിലീപിന്റെ ദുബായ് യാത്രയെ പൊലീസ് സംശയത്തോടു കൂടിയാണ് വീക്ഷിക്കുന്നത്. തിങ്കളാഴ്ച അങ്കമാലി മജിസ്‌ട്രേറ്റ് കോടതിയിലെത്തി പാസ്‌പോര്‍ട്ട് കൈപ്പറ്റിയാകും ദിലീപ് ദുബായിലേക്ക് പോകുന്നത്. ഭാര്യ കാവ്യാ മാധവനും മകൾ മീനാക്ഷിക്കുമൊ‌പ്പമാണ് ദിലീപ് ദുബായിലേക്ക് പോകുന്നത്.

നടിയെ ആക്രമിച്ച കേസിലെ മൊബൈൽ ഫോണും ദൃശ്യങ്ങൾ അടങ്ങുന്ന മെമ്മറി കാർഡും താരം വിദേശത്തേക്ക് കടത്തിയെന്നാണ് പൊലീസിന്റെ സംശയം. തെളിവുകൾ കണ്ടെത്താൻ പൊലീസിനു സാധിച്ചിട്ടില്ല. ഈ സാഹചര്യത്തില്‍ ദിലീപ് വീണ്ടും ദുബായിലേക്ക് പോകുന്നത് സംശയം വർധിപ്പിക്കുന്നു. മെമ്മറികാർഡും മൊബൈൽഫോണും ദുബായിൽ ആണുള്ളതെങ്കിൽ അത് രണ്ടും ഇനി പുറംലോകം കാണില്ലെന്ന് ദിലീപിനോട് എതിർപ്പു‌ള്ളവർ പറയുന്നു. നടിയെ ആക്രമിക്കാനുള്ള ഗൂഢാലോചന ദുബായില്‍വെച്ചും നടത്തിയതായി പൊലീസ് പറയുന്നു.