സൂപ്പര്‍മൂണ്‍ കാണാന്‍ കാത്തിരുന്നവര്‍ക്ക് മുന്നിലേക്ക് എല്ലാവിധ പ്രൌഢിയോടെയുമാണ് ‘ചന്ദ്രേട്ടന്‍’ എത്തിയത്. ഇപ്പോള്‍ കാണുന്നവര്‍ക്ക് ഇനി ഈ ജന്‍‌മം ഇതുപോലൊരു കാഴ്ച കാണാനാവില്ല എന്നതുതന്നെയാണ് ഈ ‘മൂണ്‍കാഴ്ച’യുടെ സൌന്ദര്യം. അതുകൊണ്ടുതന്നെ സൂപ്പര്‍മൂണിനെ നമ്മുടെയരുകിലെത്തിയ ഏറ്റവും വിഐപിയായ അതിഥിയായി കണക്കാക്കണം.

വലിയ അത്ഭുതം തന്നെയാണ് ഈ കാഴ്ച. 152 വര്‍ഷം മുമ്പാണ് ഇത്തരമൊരു സംഗതി ഇതിനുമുമ്പ് അരങ്ങേറിയത്. കൃത്യമായി പറഞ്ഞാല്‍ 1866 മാര്‍ച്ച് 31ന്. അന്ന് ആ ചാന്ദ്രവിസ്മയം കണ്ടവര്‍ ആരും തന്നെ ഇന്ന് ജീവിച്ചിരിപ്പില്ല എന്ന വസ്തുതയില്‍ നിന്ന് ഈ പ്രതിഭാസത്തിന്‍റെ ആദ്യകൌതുകം ആരംഭിക്കുന്നു.

ബ്ലൂമൂണ്‍ എന്നൊക്കെ വിളിക്കുന്നതുകൊണ്ട് ഇതിന് നീലനിറമായിരിക്കുമെന്ന മുന്‍‌ധാരണയോടെ സൂപ്പര്‍മൂണിനെ കാണാനെത്തിയവര്‍ അമ്പരന്നുകാണും. നീലനിറമൊരിക്കലും കാണില്ല എന്നതുതന്നെ കാരണം. ഒരേമാസത്തില്‍ രണ്ടാം തവണയും പൂര്‍ണചന്ദ്രനുദിച്ചാല്‍ അതിന്‍റെ പേരാണ് ബ്ലൂമൂണ്‍. അത്രേയുള്ളൂ ആ പേരുമായുള്ള ബന്ധം, അല്ലാതെ നീലനിറം പ്രതീക്ഷിക്കരുത്.

ചുവപ്പുനിറത്തില്‍ കാണപ്പെടുന്നതുകൊണ്ട് റെഡ്മൂണ്‍ എന്നും വിളിക്കുന്നു. ചന്ദ്രഗ്രഹണം കഴിഞ്ഞയുടന്‍ ഓറഞ്ചുനിറത്തിലാണ് പ്രത്യക്ഷപ്പെടുന്നത് ചന്ദ്രേട്ടന്‍. ഗ്രഹണസമയത്ത് ചന്ദ്രന്‍റെ വലിപ്പത്തിലും വ്യത്യാസമുണ്ടാകുന്നുണ്ട്. ഏഴുശതമാനം വലിപ്പവര്‍ദ്ധനവരെയാണ് കാണാനാവുക.