ഇസ്ലാമിക് സ്റ്റേറ്റ് ഭീകരര്‍ തട്ടിക്കൊണ്ടുപോയ മലയാളി വൈദികന്‍ ഫാ ടോം ഉഴുന്നാലിലിനെ ദു:ഖവെള്ളിയാഴ്ച ക്രൂശിലേറ്റിയതായി സ്ഥിരീകരിക്കാത്ത റിപ്പോര്‍ട്ട്. വാഷിംഗ്‌ടണ്‍ ടൈംസ് അടക്കമുള്ള മാധ്യമങ്ങളാണ് ഈ വാര്‍ത്ത പുറത്തുവിട്ടത്. ഈസ്റ്റര്‍ ദിനത്തിലെ ആരാധനയ്ക്കിടെ വിയന്നയില്‍ കര്‍ദ്ദിനാള്‍ ക്രിസ്റ്റോഫ് ഷോന്‍ബോണ്‍ ഇക്കാര്യം സ്ഥിരീകരിച്ചതായും റിപ്പോര്‍ട്ടുകളില്‍ വ്യക്തമാക്കുന്നു.

യമനില്‍ നിന്ന് തട്ടിക്കൊണ്ടുപോയ ഫാ ടോം ഉഴുന്നാലിലിനെ ദു:ഖവെള്ളിയാഴ്ച ക്രൂശിലേറ്റുമെന്ന് നേരത്തെ തന്നെ റിപ്പോര്‍ട്ടുകള്‍ ഉണ്ടായിരുന്നു. വൈദികനെ ഇസ്ലാമിക് സ്റ്റേറ്റ് തീവ്രവാദികള്‍ ആണ് തട്ടിക്കൊണ്ടു പോയതെന്ന് വിദേശകാര്യമന്ത്രി സുഷമ സ്വരാജ് നേരത്തെ അറിയിച്ചിരുന്നു.

സലേഷ്യന്‍ ഡോണ്‍ ബോസ്കോ വൈദികനായ ടോം ഉഴുന്നാലിലിനെ മാര്‍ച്ച് നാലാം തിയതിയാണ് യമനില്‍ നിന്ന് ഐ എസ് ഭീകരവാദികള്‍ തട്ടിക്കൊണ്ടു പോയത്. തെക്കന്‍ യെമനിലെ ഏഡനിലുള്ള മിഷനറീസ് ഓഫ് ചാരിറ്റി സന്യാസിനീ സമൂഹത്തിന്റെ വൃദ്ധസദനത്തില്‍ നിന്നാണ് തട്ടിക്കൊണ്ടുപോയത്. നാലു കന്യാസ്ത്രീകള്‍ ഉള്‍പ്പെടെ 16 പേരെ ഭീകരര്‍ കൊലപ്പെടുത്തുകയും ചെയ്തിരുന്നു.

കോട്ടയം രാമപുരം ഉഴുന്നാലില്‍ കുടുംബാംഗമാണ് ഫാ ടോം.