നമ്മുടെ ശരീരത്തിൻ്റെ എല്ലാ കോശങ്ങൾക്കും അവയവങ്ങൾക്കും അതിൻ്റെ പ്രവർത്തനങ്ങൾ കാര്യക്ഷമമായി നടക്കാൻ ഏറ്റവും ആവശ്യമുള്ള ഒന്നാണ് വെള്ളം. ശരീരത്തിൻ്റെ ആവശ്യങ്ങൾക്കനുസരിച്ച് ഓരോ ആളുകളും കുടിക്കേണ്ട വെള്ളത്തിൻ്റെ അളവ് വ്യത്യസ്തമാണ്.

ആരോഗ്യം നിലനിർത്താൻ വെള്ളം അത്യാവശ്യമാണെങ്കിലും അമിതമായി വെള്ളം കുടിക്കുന്നതും ആരോഗ്യപ്രശ്നങ്ങൾ ഉണ്ടാക്കും. ശരീരത്തിൽ ജലാംശത്തിൻ്റെ അളവ് കൂടിയാൽ എന്ത് സംഭവിക്കും?

ശരീരത്തിൽ കൂടുതലായി വരുന്ന വെള്ളം പുറന്തള്ളുന്നത് വൃക്ക സംബന്ധമായ പ്രശ്നങ്ങൾക്ക് കാരണമാകും. ശരീരത്തിലെ അമിതമായ ജലാംശം രക്തത്തിലെ ഉപ്പിൻ്റെ അളവ് കുറയാൻ ഇടയാക്കും. ഹൈപ്പോനോട്രെമിയ എന്നാണ് ഈ അവസ്ഥയ്ക്ക് പറയുന്നത്. ഇതുമൂലം പേശികൾക്ക് ബലക്കുറവ്,പേശിവേദന,തലക്കറക്കം എന്നിവയ്ക്ക് കാരണമാകും.

ഈ അവസ്ഥ ഒഴിവാക്കാനായി മോര്,ഉപ്പും പഞ്ചസാരയും ചേർത്ത നാരങ്ങാവെള്ളം, തേങ്ങാവെള്ളം,തൈര് എന്നിവ ഉപയോഗിക്കുന്നത് ശീലമാക്കാവുന്നതാണ്. ഒരാൾ ഒരു ദിവസം കുറഞ്ഞത് 8 ഗ്ലാസ് വെള്ളം കുടിക്കണമെന്ന് പറയുമെങ്കിലും ഓരോ വ്യക്തിയേയും അനുസരിച്ച് ഇത് വ്യത്യാസപ്പെടും. പ്രായം,ഭക്ഷണത്തിലെ പോഷകങ്ങളുടെ അളവ്,ശരീരഭാരം,വ്യായാമം എന്നിവ കൂടി കണക്കിലെടുത്താണ് കുടിക്കേണ്ട വെള്ളത്തിൻ്റെ അളവ് നിശ്ചയിക്കേണ്ടത്.