അഭിറാം മനോഹർ|
Last Modified ബുധന്‍, 14 ഓഗസ്റ്റ് 2024 (15:11 IST)
ജീവിതത്തിന് ലക്ഷ്യമില്ലെന്ന തോന്നല്‍ പ്രായമാകുന്നവരില്‍ ഡിമെന്‍ഷ്യയുടെ ആദ്യ ലക്ഷണമാകാമെന്ന് പഠനം, പ്രായമാകുന്നതോടെ വ്യക്തിഗത വളര്‍ച്ചയ്ക്ക് അവസരമില്ലെന്ന തോന്നലും ജീവിതത്തിന് ലക്ഷ്യമില്ലെന്ന ചിന്തയുമെല്ലാം പിന്നീട് ഡിമെഷ്യയിലേക്ക് നയിക്കാമെന്ന് ചൈനയിലെ അഗ്രികള്‍ച്ചര്‍ യൂണിവേഴ്‌സിറ്റിയിലെ ന്യൂട്രീഷന്‍ ആന്റ് ഹെല്‍ത്ത് ഡിപ്പാര്‍ട്ട്‌മെന്റ് ഗവേഷകര്‍ നടത്തിയ പഠനത്തില്‍ പറയുന്നു.
ഇത്തരം ചിന്തകള്‍ ദൈനംദിന പ്രവര്‍ത്തനങ്ങളെ ബാധിക്കില്ലെങ്കിലും മൂന്ന് മുതല്‍ ആറ് വര്‍ഷങ്ങള്‍ക്കുള്ളില്‍ ദൈനംഫിന പ്രവര്‍ത്തനങ്ങളെ ബാധിച്ചുതുടങ്ങുമെന്ന് ഗവേഷകര്‍ പറയുന്നു. മാനസിക ആരോഗ്യം, മസ്തിഷ്‌ക വാര്‍ധക്യം,ഡിമെന്‍ഷ്യ എന്നിവയെല്ലാം ബന്ധപ്പെട്ട് കിടക്കുന്നവയാണെന്ന് മുന്‍ പഠനങ്ങളില്‍ തെളിയിക്കപ്പെട്ടിട്ടുള്ളതാണെന്നും മാനസിക ക്ഷേമത്തിന്റെ പ്രധാനഭാഗം ജീവിതത്തിലെ ലക്ഷ്യബോധവുമായി കണക്ടടാണെന്നും പഠനത്തില്‍ പറയുന്നു.
10 വര്‍ഷങ്ങളിലായി ശരാശരി 80 വയസ് പ്രായമുള്ള 910 പേരില്‍ നടത്തിയ പഠനത്തില്‍ അവരുടെ മസ്തിഷ്‌ക പ്രവര്‍ത്തനം,അറിവ്,മനശാസ്ത്രപരമായ ആരോഗ്യം എന്നിവ വാര്‍ഷിക പഠനത്തിന് വിധേയമാക്കി. പഠനത്തില്‍ വിധേയരയവരില്‍ മൂന്നിലൊന്ന് ആളുകളിലും വൈജ്ഞാനിക വൈകല്യമുണ്ടായതായി കണ്ടെത്തി. അതില്‍ മൂന്നില്‍ ഒരാളില്‍ ഇത് ഡിമെന്‍ഷ്യയായി വികസിച്ചതായി ന്യൂറോളജി ന്യൂറോ സര്‍ജറി ആന്‍ഡ് സെക്യാട്രി ജേണലില്‍ പറയുന്നു. പഠനം നടത്തിയവരില്‍ 75 ശതമാനവും സ്ത്രീകളായിരുന്നു.
