ആര്യന്‍ എന്ന പൊലീസ് ഉദ്യോഗസ്ഥന്‍ ഹിന്ദി സിനിമാലോകത്ത് ചര്‍ച്ചാവിഷയമായിരിക്കുന്നു. ഹിന്ദിയിലെ പ്രമുഖരായ താരങ്ങളേക്കാള്‍ പക്വതയോടെ, തന്‍‌മയത്വത്തോടെ ആ പൊലീസ് കഥാപാത്രത്തെ അവതരിപ്പിച്ചിരിക്കുന്നത് മലയാളത്തിന്‍റെ ബിഗ്സ്റ്റാര്‍ പൃഥ്വിരാജ് ആണ്. ‘ഔറംഗസേബ്’ എന്ന സിനിമയില്‍ പേരിനൊരു നായകന്‍ വേറെയുണ്ടെങ്കിലും യഥാര്‍ത്ഥ നായകന്‍ പൃഥ്വി തന്നെ. പൃഥ്വിയുടെ നറേഷനിലാണ് കഥ മുന്നോട്ട് നീങ്ങുന്നതും.
ബോക്സോഫീസില്‍ വലിയ പ്രകടനം കാഴ്ചവയ്ക്കാന്‍ ഔറംഗസേബിന് കഴിയുന്നില്ലെങ്കിലും പൃഥ്വിയുടെ കഥാപാത്രം ശ്രദ്ധിക്കപ്പെട്ടു. ഇതോടെ വലിയ ഓഫറുകളാണ് ബോളിവുഡില്‍ പൃഥ്വിയെ തേടിയെത്തുന്നത്. ലഭിക്കുന്ന തിരക്കഥകള്‍ വളരെ ശ്രദ്ധയോടെ വായിക്കുകയാണ് പൃഥ്വി ഇപ്പോള്‍.
ഫറാ ഖാന് സംവിധാനം ചെയ്യുന്ന ‘ഹാപ്പി ന്യൂ ഇയര്‍’ ആണ് പൃഥ്വി ഇനി അഭിനയിക്കുന്ന ഹിന്ദിച്ചിത്രം. ഷാരുഖ് ഖാന്, അഭിഷേക് ബച്ചന്‍ എന്നിവരും ഈ സിനിമയില്‍ പൃഥ്വിക്കൊപ്പം ഉണ്ടാകും. “പല കാരണങ്ങള്‍ കൊണ്ട് ആ സിനിമയുടെ ഷെഡ്യൂളുകള്‍ ഇതുവരെയും തീരുമാനമായിട്ടില്ല” - പൃഥ്വിരാജ് പറഞ്ഞു.
ജീത്തു ജോസഫ് സംവിധാനം ചെയ്യുന്ന ‘മെമ്മറീസ്’, അനില്‍ സി മേനോന്‍ സംവിധാനം ചെയ്യുന്ന ‘ലണ്ടന്‍ ബ്രിഡ്ജ്’ എന്നിവയാണ് പൃഥ്വിയുടെ പുതിയ മലയാളം സിനിമകള്‍.
