ന്യൂഡല്‍ഹി|
jibin|
Last Modified വ്യാഴം, 5 ഒക്‌ടോബര്‍ 2017 (20:07 IST)
ഇന്ത്യന്‍ ക്രിക്കറ്റ് ടീം നായകന്‍ വിരാട് കോഹ്‌ലിയെ ‘ചീക്കു’ ഏറെ അടുപ്പമുള്ള സഹതാരങ്ങള്‍ വിളിക്കുന്നത്. മുന്‍ നായകന്‍ മഹേന്ദ്ര സിംഗ് ധോണിയാണ് വിരാടിനെ ഇരട്ടപ്പേര് വിളിക്കുന്നതില്‍ മടികാണിക്കാത്ത ഏക വ്യക്തി.
എന്നാല്‍, ഇന്ത്യന്‍ ക്യാപ്‌റ്റനെ എന്തുകൊണ്ടാണ് ചീക്കു എന്ന് വിളിക്കുന്നത് കോഹ്‌ലിയുടെയും ധോണിയുടെയും ആരാധകര്‍ ഒരുപോലെ ചോദിച്ചിരുന്നു. ഈ ചോദ്യത്തിനുള്ള ഉത്തരം കോഹ്‌ലി തന്നെ നല്‍കിയിരിക്കുകയാണ്.
ബോളിവുഡ് സൂപ്പര്‍ താരം ആമിര്‍ഖാനുമായി നടത്തിയ ടിവി പരിപാടിക്കിടെയാണ് കോഹ്‌ലി ചീക്കുവെന്ന ഇരട്ടപ്പേരിന് പിന്നിലുള്ള കഥ തുറന്നുപറഞ്ഞത്.
“ അണ്ടര്‍ 17 ടീമില്‍ കളിക്കുന്ന സമയത്ത് പ്രത്യേക രീതിയില്‍ താന്‍ മുടി വെട്ടി. പുതിയ ഹെയര്‍ സ്‌റ്റൈല്‍ വന്നതോടെ തന്റെ ചെവി വലുതായതു പോലെ തോന്നി. മുയലിന്റെ ചെവിയോട് സാദൃശ്യപ്പെടുത്തി കളിയാക്കികൊണ്ട് ചില താരങ്ങള്‍ രംഗത്തെത്തുകയും ചീക്കു എന്ന് വിളിക്കാന്‍ തുടങ്ങുകയുമായിരുന്നു ”- എന്നും കോഹ്‌ലി പറയുന്നു.
ചീക്കു എന്ന പേര് ടീമില്‍ ഉള്ളവര്‍ക്കൊഴിച്ച് കൂടുതല്‍ പേര്‍ക്ക് അറിയില്ലായിരുന്നു. എന്നാല്‍ ധോണി ഭായ് സ്റ്റംമ്പിന് പിറകില്‍ന്നും ഈ പേര് വിളിച്ചതോടെയാണ് ലോകം മുഴുവന്‍ തന്റെ ഇരട്ടപ്പേര് അറിഞ്ഞതെന്നും കോഹ്‌ലി പറഞ്ഞു.
കാമുകി അനുഷ്‌ക ശര്‍മയുമായി നല്ല ബന്ധമാണുള്ളത്. വൈകിയെത്തുന്ന സ്വഭാവമാണ് അനുഷ്‌കയുടേത്. ഇക്കാര്യത്തില്‍ തനിക്ക് എതിര്‍പ്പുണ്ടെങ്കിലും കഴിഞ്ഞ നാല് വര്‍ഷമായി ഒരു വ്യക്തി എന്ന നിലയില്‍ അവര്‍ തന്നെ ഏറെ സ്വാധീനിച്ചിട്ടുണ്ടെന്നും കോഹ്‌ലി കൂട്ടിച്ചേര്‍ത്തു.
