ഓള്‍റൗണ്ടര്‍ ഹര്‍ദിക് പാണ്ഡ‍്യക്ക് വിശ്രമം നല്‍കി ശ്രീലങ്കയ്‌ക്കെതിരായ ആദ്യ രണ്ട് ടെസ്റ്റിനുള്ള ഇന്ത്യന്‍ ക്രിക്കറ്റ് ടീമിനെ പ്രഖ്യാപിച്ചു. അ​മി​ത ജോ​ലി​ഭാ​രം മൂലമാണ് യുവതാരത്തിന് വിശ്രമം നല്‍കുന്നതെന്ന് ബി​സി​സി​ഐ അറിയിച്ചു.

തുടര്‍ച്ചയായ മത്സരങ്ങള്‍ കളിക്കുന്നതു മൂലം പാണ്ഡ്യ ക്ഷീണിതനാണ്. ഈ സാഹചര്യത്തില്‍ വിശ്രമം അനുവദിക്കപ്പെട്ടിരിക്കുന്ന സമയത്ത് ബം​ഗ​ളു​രു​വി​ലെ നാ​ഷ​ണ​ൽ ക്രി​ക്ക​റ്റ് അ​ക്കാ​ദ​മി​യി​ൽ സ്‌ട്രംഗ്‌ത് ട്രെയിനിംഗ് നടത്താനും താരത്തിനോട് ബി​സി​സി​ഐ നി​ർ​ദേ​ശി​ച്ചു.

പാണ്ഡ്യയെ ടീമില്‍ നിന്നും ഒഴിവാക്കിയെങ്കിലും പകരക്കാരനെ ഉള്‍പ്പെടുത്തിയിട്ടില്ല. വിരാട് കോഹ്‌ലി ക്യാപ്റ്റനായി തുടരും. അജിങ്ക്യ രഹാനെയാണ് വൈസ് ക്യാപ്റ്റന്‍. ഈമാസം പതിനാറിന് കൊല്‍ക്കത്തയിലാണ് ഒന്നാം ടെസ്റ്റിന് തുടക്കമാവുക. മൂന്ന് ടെസ്‌റ്റുകളാണ് ഇന്ത്യ ലങ്കയ്‌ക്കെതിരെ കളിക്കുക.

ആദ്യ രണ്ട് ടെസ്റ്റിനുള്ള ഇന്ത്യന്‍ ടീം: വിരാട് കോലി(ക്യാപ്റ്റന്‍), കെഎല്‍ രാഹുല്‍, മുരളി വിജയ്, ശീഖര്‍ ധവാന്‍, ചേതേശ്വര്‍ പൂജാര, അജിങ്ക്യാ രഹാനെ, രോഹിത് ശര്‍മ, വൃദ്ധിമാന്‍ സാഹ, ആര്‍ അശ്വിന്‍, രവീന്ദ്ര ജഡേജ, കുല്‍ദീപ് യാദവ്, മുഹമ്മദ് ഷാമി, ഉമേഷ് യാദവ്, ഭുവനേശ്വര്‍കുമാര്‍, ഇഷാന്ത് ശര്‍മ.