ആവേശകരമായ ക്രിക്കറ്റ് ടെസ്റ്റില്‍ ബംഗ്ലാദേശിന് മൂന്നു വിക്കറ്റിന്റെ നാടകീയ ജയം. സിംബാവെയ്ക്കെതിരായ മൂന്നു ടെസ്റ്റ് പരമ്പരയിലെ ആദ്യ ടെസ്റ്റില്‍ മൂന്നാംദിനത്തിലാണ് ബംഗ്ലാദേശ് വിജയം പിടിച്ചെടുത്തത്. വിജയത്തിനു രണ്ടാം ഇന്നിംഗ്സില്‍ 101 റണ്‍സ് വേണ്ടിയിരുന്ന ആതിഥേയര്‍ക്ക് ലക്ഷ്യം നേടുന്നതിനിടെ ഏഴു വിക്കറ്റുകളും നഷ്ടപ്പെട്ടു.

സ്കോര്‍:
സിംബാബ്വെ 240, 114.
ബംഗ്ലദേശ് 254, ഏഴിന് 101. അനായാസവിജയം എന്ന ലക്ഷ്യത്തോടെ രണ്ടാം ഇന്നിങ്സിനിറങ്ങിയ ബംഗ്ലദേശിന് സ്കോര്‍ ബോര്‍ഡില്‍ ആദ്യ റണ്‍ ചേര്‍ക്കുംമുമ്പേ നഷ്ടപ്പെട്ടതു മൂന്നു വിക്കറ്റുകള്‍. നാലാം വിക്കറ്റില്‍ മഹ്മുദുല്ലയും (28), ഷാക്കിബ് അല്‍ ഹസനും (15) ചേര്‍ന്നെടുത്ത 46 റണ്‍സിന്റെ അടിത്തറയില്‍ അവര്‍ വിജയം കെട്ടിപ്പടുത്തു.

വീണ്ടും വിക്കറ്റുകള്‍ നഷ്ടമായ ബംഗ്ലദേശ് ഏഴിന് 82 എന്ന നിലയിലേക്കു വീണെങ്കിലും ക്യാപ്റ്റന്‍ മുഷ്ഫിഖര്‍ റഹിമും (23) തൈജുലും (15) ചേര്‍ന്ന് വിജയം സ്വന്തമാക്കി. എല്‍ട്ടണ്‍ ചിഗുംബു നാലു വിക്കറ്റെടുത്തു. നേരത്തേ, ഇടംകയ്യന്‍ സ്പിന്നര്‍ തൈജുള്‍ ഇസ്ലാമിന്റെ എട്ടുവിക്കറ്റ് നേട്ടമാണ് സിംബാവെയുടെ രണ്ടാം ഇന്നിംഗ്സിനെ ദുര്‍ബലമാക്കിയത്. ഖുല്‍നയില്‍ നടക്കുന്ന രണ്ടാം ടെസ്റ്റ് തിങ്കളാഴ്ച ആരംഭിക്കും.

മലയാളം വെബ്‌ദുനിയയുടെ ആന്‍‌ഡ്രോയ്ഡ് മൊബൈല്‍ ആപ്പ് ഡൌണ്‍‌ലോഡ് ചെയ്യാന്‍ ഇവിടെ ക്ലിക്ക് ചെയ്യുക. ഫേസ്ബുക്കിലും ട്വിറ്ററിലും
പിന്തുടരുക.