Last Updated:
വ്യാഴം, 14 ഓഗസ്റ്റ് 2014 (11:37 IST)
പ്രശസ്ത നടിയും തെന്നിന്ത്യന്‍ സൂപ്പര്‍ സ്റ്റാര്‍ സൂര്യയുടെ ഭാര്യയുമായ ജ്യോതിക വെള്ളിത്തിരയില്‍ തിരിച്ചെത്തുന്നു. ഏഴ് വര്‍ഷത്തെ ഇടവേളയ്ക്ക് ശേഷമാണ് ജ്യോതിക എത്തുന്നത്. ഹൌ ഓള്‍ഡ് ആര്‍ യുവിന്റെ തമിഴ് പതിപ്പിലൂടെയാണ് ജ്യോതികയുടെ തിരിച്ചുവരവ്. റോഷന്‍ ആന്‍ഡ്രൂസ് തന്നെയാണ് തമിഴ് പതിപ്പിന്റെയും സംവിധായകന്‍.
15 വര്‍ഷത്തിന്ശേഷം സിനിമയില്‍ തിരിച്ചെത്തിയ മഞ്ജു വാര്യര്‍ക്ക് നിരുപമ രാജീവ് എന്ന നായിക വേഷം നേടിക്കൊടുത്ത പ്രശംസ ഏറെയാണ്. കഥാപാത്രത്തിന്റെ ശക്തിയാണ് ജ്യോതികയെ ഹൌ ഓള്‍ഡ് ആര്‍ യുവിലേക്ക് ആകര്‍ഷിച്ചത്. സാമൂഹ്യപ്രതിബദ്ധതയും സ്ത്രീശാക്തീകരണവും നല്‍കുന്ന തിരക്കഥ ജ്യോതികയ്ക്ക് ഏറെ ഇഷ്ടമായി. ജ്യോതികയുടെ തിരിച്ചുവരവ് സംബന്ധിച്ച് ഏറെ വാര്‍ത്തകള്‍ പ്രചരിച്ചിരുന്നെങ്കിലും സ്ഥിരീകരണമുണ്ടായിരുന്നില്ല.
കഴിഞ്ഞ ദിവസം ഒരു മാധ്യമത്തിന് നല്‍കിയ അഭിമുഖത്തില്‍
സൂര്യ ഇക്കാര്യം വ്യക്തമാക്കിയിരുന്നു. ജ്യോതികയുടെ തിരിച്ചുവരവിനെക്കുറിച്ചുള്ള ചോദ്യത്തിന് ‘ജോ കഥകള്‍ കേള്‍ക്കുന്നുണ്ട്. അവരെ ആകര്‍ഷിക്കുന്ന ഒരു കഥ വന്നാല്‍ അഭിനയിക്കും. ശക്തമായ ഒരു കഥപാത്രത്തിന് നോക്കിയിരിക്കുകയാണ്. അങ്ങനെ നല്ല ഒരു കഥ വന്നാല്‍ ഞാന്‍ നായകനാകണമെന്ന് നിര്‍ബന്ധമില്ല’ എന്നായിരുന്നു സൂര്യയുടെ മറുപടി.
ഹൌ ഓള്‍ഡ് ആര്‍ യുവിന്റെ തമിഴ് പതിപ്പില്‍ ജ്യോതിക നായികയാവുമെന്ന് സംവിധായകന്‍ റോഷന്‍ ആന്‍ഡ്രൂസ് ഫേസ്‌ബുക്കിലൂടെ സ്ഥിരീകരിച്ചു. സൂര്യയുടെ ടു ഡി എന്റര്‍ടെയ്ന്‍മെന്റാണ് ചിത്രം നിര്‍മിക്കുന്നത്. ഹിന്ദി ഉള്‍പ്പെടെയുള്ള ഭാഷകളിലേക്കുള്ള 'ഹൗ ഓള്‍ഡ് ആര്‍ യു'വിന്റെ റീമേക്ക് അവകാശം സ്വന്തമാക്കിയിരിക്കുന്നത് സൂര്യയുടെ കമ്പനിയാണ്.
