അഭിറാം മനോഹർ|
Last Modified വെള്ളി, 8 നവം‌ബര്‍ 2024 (15:21 IST)
ഇന്ത്യയും ദക്ഷിണാഫ്രിക്കയും തമ്മിലുള്ള നാല് മത്സരങ്ങളടങ്ങിയ ടി20 പരമ്പരയ്ക്ക് ഇന്ന് ഡര്‍ബനില്‍ തുടക്കം. 2024 ടി20 ലോകകപ്പ് ഫൈനലിന് ശേഷം ഇരുടീമുകളും ഏറ്റുമുട്ടുന്നുവെന്ന പ്രത്യേകതയും മത്സരത്തിനുണ്ട്. പേസ് ബൗളിങ്ങിനെ തുണയ്ക്കുന്ന ദക്ഷിണാഫ്രിക്കന്‍ വിക്കറ്റുകളില്‍ ഇന്ത്യ ഇറങ്ങുമ്പോള്‍ കഴിഞ്ഞ ടി20 ലോകകപ്പ് ടീമില്‍ നിന്നും ഇന്ത്യന്‍ ടീം ഏറെ വ്യത്യസ്തമാണ്.
ലോകകപ്പ് ഫൈനലിലെ ഇലവനിലെ വിരാട് കോലി,രോഹിത് ശര്‍മ, രവീന്ദ്ര ജഡേജ, ജസ്പ്രീത് ബുമ്ര,റിഷഭ് പന്ത് എന്നിവരൊന്നും ദക്ഷിണാഫ്രിക്കയ്‌ക്കെതിരായ പരമ്പരയിലില്ല. അതേസമയം ബംഗ്ലാദേശിനെതിരായ അവസാന ടി20 മത്സരത്തില്‍ സെഞ്ചുറിയുമായി തിളങ്ങിയ സഞ്ജു സാംസണിന് ദക്ഷിണാഫ്രിക്ക പരമ്പര നിര്‍ണായകമാവും. ബംഗ്ലാദേശിനെതിരായ ഫോം ദക്ഷിണാഫ്രിക്കന്‍ പേസ് പിച്ചുകളിലും തുടരാനായാല്‍ ഇന്ത്യന്‍ ടി20 ടീമിലെ സ്ഥാനം ഉറപ്പിക്കാന്‍ സഞ്ജുവിന് സാധിക്കും.
പരമ്പരയിലെ ആദ്യ മത്സരം ഡര്‍ബനിലാണ്. തുടര്‍ന്ന് ഗിബെര്‍ഹ,സെഞ്ചൂറിയന്‍,ജോഹന്നാസ് ബര്‍ഗ് എന്നിവിടങ്ങളിലും മത്സരം നടക്കും. സ്‌പോര്‍ട്‌സ് 18 ചാനലിലും ജിയോ സിനിമ ആപ്പിലും മത്സരങ്ങള്‍ തത്സമയം കാണാം. ഇന്ത്യന്‍ സമയം വൈകീട്ട് എട്ടര മണിയ്ക്കാണ് മത്സരങ്ങള്‍.
