കൊളംബോ ക്രിക്കറ്റ് ടെസ്റ്റിൽ ഇന്ത്യയ്ക്ക് 278 റൺസിന്റെ തകര്‍പ്പന്‍ ജയം. ഇന്ത്യ ഉയർത്തിയ 413 റൺസിന്റെ വിജയലക്ഷ്യം പിന്തുടർന്ന ശ്രീലങ്ക 134 റൺസിന് എല്ലാവരും പുറത്തായി. ദിമുത് കരുണരത്നെ (46) മാത്രമാണ് ലങ്കൻ നിരയിൽ അൽപമെങ്കിലും പിടിച്ചു നിന്നത്. അഞ്ചു വിക്കറ്റ് വീഴ്‌ത്തിയ ആർ.അശ്വിനും മൂന്ന് വിക്കറ്റ് വീഴ്‌ത്തിയ അമിത് മിശ്രയുമാണ് ശ്രീലങ്കയെ തകർത്തത്.


ലങ്കയുടെ അഞ്ച് ബാറ്റ്സ്‌മാന്മാർ രണ്ടക്കം കാണാതെ പുറത്തായത്. 413 റണ്ണിന്റെ വിജയ ലക്ഷ്യവുമായി ഇറങ്ങിയ ലങ്കയ്ക്ക് 72 റണ്ണെടുക്കുന്നതിനിടെ രണ്ട് വിക്കറ്റുകൾ നഷ്ടമായിരുന്നു. അഞ്ചാം ദിനത്തിൽ വേണ്ടത് 341 റൺസ് എന്ന ലക്ഷ്യവുമായി ഇറങ്ങിയ ലങ്കന്‍ നിരയെ അശ്വിന്‍ തരിപ്പണമാക്കുകയായിരുന്നു. കുമാര്‍ സംഗക്കാര (18), സില്‍വ(1), കരണരത്‌ന (46), ആഞ്ചലോ മാത്യൂസ് (23), ചന്‍ഡിമല്‍ (15), തിരുമാനെ (11), മുബാറക് (0), പ്രസാദ് (0), ഹെറാത്ത് (4), കുശാല്‍ (5), ചമീര (7) എന്നിവരാണ് ലങ്കയുടെ മറ്റ് സ്‌കോറര്‍മാര്‍. ആദ്യ മൽസരത്തിൽ അപ്രതീക്ഷിത തോൽവി ഏറ്റുവാങ്ങിയ ഇന്ത്യക്ക് ഏറെ നിർണായകമായിരുന്നു ഈ മൽസരം. പരമ്പരയിലെ മൂന്നാം മൽസരം 28 ന് തുടങ്ങും.