സംഭവബഹുലമായ കഥഗതിയിലൂടെയാണ് റിയാലിറ്റി ഷോയായ ബിഗ് ബോസ് കടന്നു പോകുന്നത്. എപ്പോൾ ആർക്ക് എന്ത് സംഭവിക്കുമെന്ന് മുൻകൂട്ടി പ്രവചിക്കാൻ സാധിക്കുകയില്ല. കഴിഞ്ഞ ഒരാഴ്ച പേളി മാണിയും ശ്രീനിഷും തമ്മിലുള്ള പ്രണയമായിരുന്നു വിഷയമെങ്കിൽ ഈ ഒരാഴ്ച പേളിയും അരിസ്റ്റോ സുരേഷും തമ്മിലുള്ള അടുപ്പമാണ് ഹൌസിലെ മറ്റ് അംഗങ്ങൾക്ക് പ്രശ്നമായിരിക്കുന്നത്.

ഏതായാലും രണ്ടാഴ്ച കൊണ്ട് ഒരു കാര്യം വെളിച്ചത്ത് വന്നിരിക്കുകയാണ്. വീടിനുള്ളിലെ ഭൂരിഭാഗം ആളുകളും പേളിക്കെതിരാണ്. സാബു, ശ്വേത, ദിയ, രഞ്ജിനി എന്നിവർ പേളിയെ പുറത്താക്കാനുള്ള പരിപാടിയിലാണ്. അടുത്ത എവിക്ഷനിൽ പേളിയെ എല്ലാവരും നോമിനേറ്റ് ചെയ്യാനുള്ള സാധ്യതയാണുള്ളത്. അതിനുള്ള കരുക്കളാണ് ഇപ്പോൾ ഹൌസിൽ നടന്നുകൊണ്ടിരിക്കുന്നത്.

കഴിഞ്ഞ ദിവസം സുരേഷിനെതിരെ ബിഗ് ബോസ് ഹൗസിലെ മത്സരാര്‍ത്ഥികളെല്ലാം ഒന്നടങ്കം രംഗത്തെത്തിയിരുന്നു. അനൂപും സാബുവുമായിരുന്നു അതില്‍ പ്രധാനം. പേളിയായിരുന്നു വിഷയം. തന്നെ കുറിച്ച് അരിസ്റ്റോ സുരേഷ് മോശമായി സംസാരിച്ചെന്ന ആരോപണവുമായാണ് അനൂപ് ചന്ദ്രന്‍ രംഗത്തെത്തിയത്.

ഒരു ടാസ്‌കിനിടെ തന്നെ ചതിയനും വിശ്വാസ വഞ്ചകനെന്നും സുരേഷ് പറഞ്ഞെന്ന് ചൂണ്ടികാട്ടിയാണ് സുരേഷിനെതിരെ അനൂപ് രംഗത്തെത്തിയത്. ഇതിനിടെ അനൂപ് പേളിയെ വ്യക്തിപരമായി ആക്രമിക്കാന്‍ ശ്രമിച്ചതായി സുരേഷും ആരോപണമുയര്‍ത്തി.

വിഷയത്തില്‍ പേളിയെ വലിച്ചിഴച്ചതോടെ സംഭവം കൂടുതല്‍ വഷളായി. പേളിയ്ക്ക് വക്കാലത്തുമായി വന്ന അരിസ്റ്റോ സുരേഷിനോട് പൊട്ടിത്തെറിക്കുകയായിരുന്നു സാബുവും അനൂപും. സംസാരം അതിരുകടന്നപ്പോൾ വിഷയത്തില്‍ രഞ്ജിനിയുമായുള്ള വിഷയവും ഇവര്‍ ചൂണ്ടികാട്ടി. ഇതോടെ സുരേഷിനെതിരെ ദിയയും രംഗത്തെത്തി.

അരിസ്‌റ്റോ സുരേഷ് പേളിയുടെ അച്ഛന് (തന്ത) വിളിച്ചെന്ന് സാബു പറഞ്ഞപ്പോള്‍ താനത് ടാസ്‌കിന്റെ ഭാഗമായാണ് ചെയ്തതെന്ന് സുരേഷ് പറഞ്ഞു. അരിസ്റ്റോ പേളിയുടെ തന്തയ്ക്ക് വിളിച്ചപ്പോള്‍ പ്രശ്‌നമില്ല, ഞാന്‍ തമാശയ്ക്ക് വേണ്ടി ചെരുപ്പ് വലിച്ചെറിഞ്ഞപ്പോള്‍ പേളി അത് പ്രശ്‌നമാക്കിയെന്നും പറഞ്ഞ് സാബു പൊട്ടിത്തെറിച്ചു.

സംഭവം എല്ലാവരും കൂടെ വഷളാക്കി, പേളിക്ക് നേരെ തിരിഞ്ഞു. ഉടന്‍ തന്നെ അരിസ്റ്റോ സുരേഷ് പേളിയുടെ കാലു പിടിച്ച് മാപ്പു പറയുകയും പേളി കാലു വലിക്കുകയും ചെയ്തു. ഈ പ്രവൃത്തി കണ്ട് നിന്നവര്‍ നാടകം എന്ന് പറഞ്ഞ് പുച്ഛിക്കുകയും ചെയ്തു.

സുരേഷേട്ടന്‍ ടാസ്‌കിന്റെ ഭാഗമായാണ് ചെയ്തതെന്നും അതിനാല്‍ അതില്‍ വിഷമമില്ലെന്നും എന്നാല്‍ ചെരുപ്പെറിഞ്ഞത് അങ്ങനെയല്ലെന്നുമായിരുന്നു പേളിയുടെ വാദം. പേളിയും തന്റെ നിലപാട് വ്യക്തമാക്കി. അരിസ്റ്റോ സുരേഷുമായുള്ള അമിത കൂട്ടുക്കെട്ടും ശ്രീനിഷുമായുള്ള പേളിയുടെ അടുപ്പവും ബിഗ് ബോസ് ഹൗസിലെ സ്ഥിരം ചര്‍ച്ചയായിരിക്കുകയാണ്.