സജിത്ത്|
Last Modified വെള്ളി, 23 ഡിസം‌ബര്‍ 2016 (12:35 IST)
നോട്ട് നിരോധനത്തില്‍ വലയുന്ന ജനങ്ങള്‍ക്ക് ഒരു കൈത്താങ്ങുമായി ഇ കൊമേഴ്‌സ് സൈറ്റ് സ്നാപ്ഡീല്. രണ്ടായിരം രൂപ വരെയുള്ള പണത്തെയാണ് കാഷ്@ഹോം എന്ന സേവനത്തിലൂടെ സ്നാപ്ഡീല് നിങ്ങളുടെ വീട്ടിലെത്തിക്കുക. നോട്ട് പ്രതിസന്ധിയെ തുടര്‍ന്ന് കാശിനായി വലയുന്ന ജനങ്ങള്‍ക്ക് ദൈനംദിന ആവശ്യങ്ങള്‍ക്കുള്ള പണം ലഭ്യമാക്കുക എന്നതാണ് ക്യാഷ്@ഹോം സേവനത്തിലൂടെ സ്നാപ്ഡീല് ലക്ഷ്യം വെയ്ക്കുന്നതെന്ന് സ്നാപ്ഡീല് സഹസ്ഥാപകന്‍ രോഹിത് ബന്‍സാല്‍ അറിയിച്ചു.
കാഷ് ഓണ്‍ ഡെലിവറി സംവിധാനത്തിലൂടെ ലഭിക്കുന്ന പണമാണ് സ്നാപ്ഡീല് തങ്ങളുടെ ഉപഭോക്താക്കള്‍ക്ക് നല്‍കുന്നത്. ക്യാഷ്@ഹോം സേവനങ്ങള്‍ക്ക് ഒരു രൂപ നിരക്കാണ് സ്നാപ്ഡീല് ഈടാക്കുന്നത്. സ്നാപ്ഡീല് ആപ്പിലൂടെയാണ് പണം ഓര്‍ഡര്‍ ചെയ്യേണ്ടത്. ഡെബിറ്റ് കാര്‍ഡ് മുഖേനയോ, ഫ്രീചാര്‍ജ്ജ് മുഖേനയോ ഉപഭോക്താക്കള്‍ക്ക് ഒരു രൂപയുടെ പെയ്‌മെന്റ് നടത്താനും സാധിക്കുമെന്നും കമ്പനി അറിയിച്ചു.
തുടര്‍ന്ന് ഓര്‍ഡര്‍ ചെയ്ത പണം കൈപറ്റുന്നതിന് മുമ്പായി സ്നാപ്ഡീല് ജീവനക്കാരന്‍ നല്‍കുന്ന പിഒഎസ് മെഷീനില്‍ ഉപഭോക്താക്കള്‍ ഡെബിറ്റ് കാര്‍ഡ് സ്വൈപ് ചെയ്ത് എത്രപണമാണ് ഓര്‍ഡര്‍ ചെയ്തത് ആ പണം അടക്കുകയും വേണം. ഗുരുഗ്രാം, ബംഗളൂരു എന്നിവടങ്ങളിലാണ് നിലവില്‍ ക്യാഷ്@ഹോം എന്ന സേവനം ലഭ്യമാകുന്നത്. ഉടന്‍ തന്നെ ഈ സേവനം രാജ്യവ്യാപകമായി ആരംഭിക്കുമെന്ന് സ്നാപ്ഡീല് അറിയിച്ചിട്ടുണ്ട്.
