ഡല്‍ഹി : വാഗൺ ആറിന്റെ പുത്തൻ മോഡലിനെ ജനുവരിയിൽ വിപണിയിൽ അവതരിപ്പിക്കാൻ ഒരുങ്ങി രാജ്യത്തെ ഏറ്റവും വലിയ കാർ നിർമ്മാതാക്കളായ മാരുതി സുസൂക്കി. ജനുവരി 23ന് വാഗൺ ആർ 2019 മോഡലിനെ കമ്പനി വിപണിയിലെത്തിക്കും. വാഗൺ ആറിന്റെ മൂന്നാം തലമുറ പതിപ്പാണ് വിപണിയിൽ അവതരിക്കാൻ തയ്യാറെടുക്കുന്നത്.

ടോള്‍ബോയ് ഡിസൈനിൽ തന്നെയാണ് വാഹനത്തെ ഒരുക്കിയിരിക്കുന്നത് എങ്കിലും കാഴ്ചയിൽ കൂടുതൽ സുന്ദരനായാണ് പുതിയ വാഗൺ ആറിന്റെ വരവ്. മുന്നിലെ ഗ്രില്ലിലും ഹെഡ്‌ലാമ്പുകളിലുമെല്ലാം ഈ മാറ്റം പ്രകടമാണ്. പഴയതിൽനിന്നും കൂടുതൽ കോം‌പാക്ട് ആയ ഡിസൈനാണ് വാഹനത്തിന് നൽകിയിരിക്കുന്നത്. മരുതി സുസൂക്കിയുടെ ഹാര്‍ട്ടെക്റ്റ് പ്ലാറ്റ്‌ഫോമിലാണ് പൂതിയ വാഗൺ ആർ ഒരുക്കിയിരിക്കുന്നത്.

പുതിയ വാഗൺ ആറിന് 3395 എം എം നീളവും, 1475 എം എം വീതിയും, 1650 എം എം ഉയരവും ഉണ്ട്. 2460 മില്ലി മീറ്ററാണ് വാഹനത്തിന്റെ വീല്‍ബേസ്. ഇന്റീരിയറിൽ കൂടുതൽ പ്രീമിയം ഫീച്ചറുകൾ പ്രതീക്ഷക്കാം എന്നാണ് റിപ്പോർട്ടുകൾ. ടച്ച്‌ സ്‌ക്രീന്‍ ഇന്‍ഫൊടെയ്‌ൻ‌മെന്റ് സിസ്റ്റവും ഡോറുകളില്‍ റിയര്‍ വ്യൂ മിററുകളും സ്ഥാനം പിടിച്ചേക്കും.

67 ബിഎച്ച്പി കരുത്തും 90 എൻഎം ടോർക്കും പരമാവധി സൃഷ്ടിക്കാൻ ശേഷിയുള്ള 1.0 ലിറ്റര്‍ K10 B പെട്രോള്‍ എഞ്ചിനായിരിക്കും പുതിയ മാരുതി സുസുക്കിയിൽ തുടിക്കുന്ന എഞ്ചിൻ. വഗൺ ആർ 2018 മോഡലിലും ഇതേ എഞ്ചിനാണ് ഉപയോഗിച്ചിട്ടുള്ളത്. ഓട്ടോമാറ്റിക് മാനുവൽ ട്രാൻസ്‌മിഷനുകളിൽ വാഹനം ലഭ്യമായിരിക്കും.