രബീന്ദ്ര നാഥ ടാഗോറിന്‍റെ നോബല്‍ സമ്മാന മെഡല്‍ മോഷണം പോയതുമായി ബന്ധപ്പെട്ട കേസ് അവസാനിപ്പിച്ചിട്ടില്ലെന്ന് സി ബി ഐ. 2004 മാര്‍ച്ചില്‍ നടന്ന സംഭവത്തെക്കുറിച്ചുള്ള കേസില്‍ വീണ്ടും അന്വേഷണം നടന്നേക്കാമെന്ന് സി ബി ഐ ഡയറക്ടര്‍ അശ്വിനി കുമാര് അറിയിച്ചു.
“നോബല്‍ മോഷണവുമായി ബന്ധപ്പെട്ട് കൂടുതല്‍ വിവരങ്ങളൊന്നും സി ബി ഐക്ക് കണ്ടെത്താനായിട്ടില്ല. അതുകൊണ്ടാണ് അന്വേഷണം അവസാനിപ്പിച്ചത്. എന്നാല്‍ കേസുമായി ബന്ധപ്പെടുന്ന എന്തെങ്കിലും വിവരങ്ങള്‍ ലഭ്യമായാല്‍ അന്വേഷണം പുനരാരംഭിക്കും” - അശ്വിനികുമാര്‍ പറഞ്ഞു.
“സി ബി ഐയെ കേസ് ഏല്‍പ്പിച്ചെങ്കിലും എന്തെങ്കിലും ഒരു വഴിത്തിരിവുണ്ടാക്കാന്‍ കഴിഞ്ഞില്ല. എന്നാല്‍ എന്തെങ്കിലും ഒരു തെളിവു കിട്ടുന്ന സാഹചര്യത്തില്‍ കേസില്‍ വീണ്ടും അന്വേഷണം ആരംഭിക്കുന്നതിന് ഒരു തടസവുമില്ല.” - അദ്ദേഹം പറഞ്ഞു.
അമൂല്യമായ ഈ സമ്മാനം മോഷണം പോയ സംഭവം നിര്‍ഭാഗ്യകരമാണെന്നാണ് സി ബി ഐ ചീഫ് പറഞ്ഞത്. ശാന്തിനികേതനിലെ വിശ്വഭാരതി സര്‍വകലാശാലയിലുള്ള രബീന്ദ്രഭവന്‍ മ്യൂസിയത്തില്‍ നിന്നാണ് നോബല്‍ സമ്മാന മെഡല്‍ മോഷണം പോയത്. സംഭവത്തിന് ശേഷം അഞ്ചുവര്‍ഷം നീണ്ട അന്വേഷണത്തിനും എന്തെങ്കിലും തുമ്പ് കണ്ടെത്താന്‍ കഴിഞ്ഞില്ല. തുടര്‍ന്നാണ് കേസ് അവസാനിപ്പിക്കാന്‍ സി ബി ഐ തീരുമാനിച്ചത്.
