സ്വര്‍ണം കൊണ്ട് നിര്‍മ്മിച്ച ഷര്‍ട്ട് ധരിച്ച് മാധ്യമ ശ്രദ്ധ നേടിയ പൂണെയിലെ എന്‍സിപി നേതാവ് ദത്ത ഫൂഗെ കൊല്ലപ്പെട്ടു. നാല്‍പ്പത്തിനാലുകാരനായ ദത്തഫുഗെയെ അദ്ദേഹത്തിന്റെ ദിഗിയിലെ ഭാരത്മാതാ നഗറിലുള്ള വീട്ടിലത്തെിയ അജ്ഞാത സംഘം കല്ലും മൂര്‍ച്ചയേറിയ ആയുധങ്ങളുമുപയോഗിച്ച് കൊലപ്പെടുത്തുകയായിരുന്നു.

വ്യാഴാഴ്ച രാത്രിയാണ് സംഭവം നടന്നത്. വീട്ടിലത്തെിയ സംഘം ചിട്ടിയുമായി ബന്ധപ്പെട്ട കാര്യങ്ങള്‍ സംസാരിക്കാന്‍ എന്ന വ്യാജേനയാണ് പുറത്തേക്ക് കൂട്ടികൊണ്ടുപോയതെന്ന് അദ്ദേഹത്തിന്റെ ഭാര്യ സീമ പൊലീസിനെ അറിയിച്ചു. എന്നാല്‍ വെള്ളിയാഴ്ച രാവിലെയാണ് ഇയാളെ കൊല്ലപ്പെട്ട നിലയില്‍ കണ്ടെത്തിയത്. സാമ്പത്തിക പ്രശ്നങ്ങളാണ് കൊലപാതകത്തിന് പിന്നിലെന്ന് പൊലീസ് പറഞ്ഞു.

അദ്ദേഹം നടത്തി വന്നിരുന്ന വക്രതുണ്ഡ് ചിട്ടി കമ്പനിയില്‍ ക്രമക്കേടുകളുണ്ടെന്ന് ഇടപാടുകാരില്‍ നിന്ന് ആരോപണമുയര്‍ന്നിരുന്നു. 3.5 കിലോ ഗ്രാം സ്വര്‍ണ്ണമുപയോഗിച്ച് ഷര്‍ട്ട് നിര്‍മ്മിച്ചതിന്റെ പേരിലാണ് ഇദ്ദേഹം മാധ്യമശ്രദ്ധ പിടിച്ചുപറ്റിയത്. കൂടാതെ ബെല്‍റ്റ്, മാലകള്‍, ബ്രേസ് ലേറ്റുകള്‍ എന്നിവയടക്കം ഏഴു കോടി രൂപയുടെ സ്വര്‍ണമായിരുന്നു ഫുഗെ ധരിച്ചിരുന്നത്.

ഒരു സമ്പൂര്‍ണ വായനാനുഭവത്തിന് മലയാളം വെബ്‌ദുനിയ ആപ്പ് ഇവിടെ ഡൌണ്‍‌ലോഡ് ചെയ്യാം