സർക്കാർ രൂപീകരണം തർക്കത്തിലായ ഗോവയിൽ മുഖ്യമന്ത്രി മനോഹർ പരീക്കർ വിശ്വാസവോട്ടു നേടി. 13 അംഗങ്ങൾ മാത്രമുള്ള ബിജെപി മറ്റു പാർട്ടികളുടെ സഹായത്തോടെ 22 അംഗങ്ങളുടെ പിന്തുണ നേടിയാണ്​ ഭൂരിപക്ഷം തെളിയിച്ചത്​.

ഗോവ ഫോർവേഡ്​ പാർട്ടിയുടെ മൂന്ന്​ അംഗങ്ങൾ, മഹാരാഷ്​ട്രവാദി ഗോമന്തക്​ പാർട്ടിയുടെ മൂന്നംഗങ്ങൾ മൂന്നു സ്വതന്ത്രർ എന്നിവരാണ്​ ബിജെപിയെ പിന്തുണയ്‌ക്കുന്നത്​. സുപ്രീംകോടതി നിർദേശപ്രകാരം നടത്തിയ വിശ്വാസവോട്ടെടുപ്പ് നടന്നത്.

40 അംഗ നിയമ സഭയിൽ 21 പേരു​ടെ പിന്തുണയാണ്​ സർക്കാരുണ്ടാക്കാൻ വേണ്ടത്​. 13 സീറ്റുകൾ നേടിയ ബിജെപി ചെറു പാര്‍ട്ടികളുടെ പിന്തുണ ഉറപ്പിച്ച്​ സർക്കാറുണ്ടാക്കാൻ അവകാശവാദം ഉന്നയിക്കുകയായിരുന്നു.

ഏറ്റവും വലിയ ഒറ്റക്കക്ഷിയായിട്ടും സർക്കാർ രൂപീകരിക്കാൻ ഗവർണർ ക്ഷണിച്ചില്ലില്ലെന്ന് ചൂണ്ടിക്കാട്ടി കോൺഗ്രസാണ് സുപ്രീം കോടതിയെ സമീപിച്ചത്. തുടർന്ന് 48 മണിക്കൂറിനകം വിശ്വാസവോട്ടു തേടാൻ സുപ്രീം കോടതി ബിജെപി സർക്കാരിന് നിർദേശം നൽകുകയായിരുന്നു.