കൂട്ടബലാത്സംഗ ശ്രമത്തില്‍ നിന്ന് രക്ഷപ്പെട്ട് കുതറിയോടിയ പതിനെട്ടുകാരി ട്രെയിന്‍ തട്ടി മരിച്ചു. മധ്യപ്രദേശിലെ ദാത്തിയയില്‍ ഗോവിന്ദപുര ഗ്രാമത്തില്‍ ആണ് സംഭവം. തിങ്കളാഴ്‌ച പുലച്ചെയായിരുന്നു സംഭവം. പെണ്‍കുട്ടിയുടെ മരണത്തില്‍ പൊലീസ് അന്വേഷണം ആരംഭിച്ചു.

കൊല്ലപ്പെട്ട പെണ്‍കുട്ടിയുടെ പേരുവിരവരങ്ങള്‍ പുറത്തു വിട്ടിട്ടില്ല.

പെണ്‍കുട്ടിയും സുഹൃത്തുക്കളും വീടിന് സമീപത്തുള്ള റെയില്‍‌വെ ട്രാക്കിന് സമീപം പ്രാഥമിക ആവശ്യത്തിനായി പോയപ്പോഴാണ് സംഭവമുണ്ടായത്. രണ്ടു പേര്‍ പെണ്‍കുട്ടിയെ കടന്നു പിടിക്കാന്‍ ശ്രമിച്ചതോടെ ഇവരില്‍ നിന്ന് രക്ഷപ്പെട്ടോടിയ പെണ്‍കുട്ടി ട്രെയിന്‍ തട്ടി മരിക്കുകയായിരുന്നു.

അതേസമയം, മരിച്ച പെണ്‍കുട്ടിയുടെ പിതാവില്‍ നിന്ന് ലഭിച്ച മൊഴിയില്‍ പൊരുത്തക്കേടുകളുണ്ടെന്ന് അന്വേഷണ സംഘം പറഞ്ഞു. മകളെ രണ്ടുപേര്‍ ചേര്‍ന്ന് ട്രെയിനിന് മുന്നിലേക്ക് തള്ളിയിടുകയായിരുന്നുവെന്നാണ് പിതാവ് പറഞ്ഞത്. ഇതോടെയാണ് അന്വേഷണത്തിലെ വിവരങ്ങള്‍ വ്യക്തമാക്കാന്‍ പൊലീസ് തയാറാകാതിരുന്നത്.