തിരുവനന്തപുരം: പരിക്കേറ്റ നിലയിൽ പൊലീസ് ആശുപത്രിയിൽ പ്രവേശിപ്പിച്ചത് പറക്കും തളിക ബിജുവെന്ന് അറിയപ്പെടുന്ന കുപ്രസിദ്ധ കുറ്റവാളിയെ. ആളെ തിരിച്ചറിഞ്ഞ പൊലീസ് തിരിച്ചെത്തിയപ്പോഴേക്കും പ്രതി
ആശുപത്രിയില്‍ നിന്നും രക്ഷപ്പെട്ടു.

ഞായറാഴ്ച വൈകിട്ടോടെയാണ് സംഭവം. തലയ്ക്കു വെട്ടേറ്റ ബിജുവിനെ പൊലീസ് സംഘം ആശുപത്രിയില്‍ എത്തിക്കുകയായിരുന്നു. സംഭവത്തിൽ പരാതിയില്ലെന്ന് ഇയാള്‍ വ്യക്തമാക്കിയതിനാല്‍ മൊഴിയെടുക്കാതെ പൊലീസ് മടങ്ങി.

പൊലീസിന് തിരിച്ചറിയാന്‍ കഴിയാതെ പോയതാണ് കുപ്രസിദ്ധ മോഷ്‌ടാവും നിരവധി കേസുകളിലെ പിടികിട്ടാപുള്ളിയുമായ ബിജുവിന് രക്ഷയായത്.

ആശുപത്രിയില്‍ പ്രവേശിപ്പിച്ചത് പറക്കും തളിക ബിജുവിനെയാണെന്ന് തിരിച്ചറിഞ്ഞ പൊലീസ് മിനിറ്റുകള്‍ക്കകം തിരിച്ചെത്തിയെങ്കിലും ഇയാള്‍ രക്ഷപ്പെട്ടിരുന്നു. ഇതോടെയാണ് വിഷയത്തില്‍ പൊലീസ് മലക്കം മറിഞ്ഞത്.

മര്‍ദനമേറ്റ സ്ഥലത്തു നിന്നു പൊലീസ് എത്തും മുമ്പേ ബിജു രക്ഷപ്പെട്ടെന്നായിരുന്നു ഉന്നത ഉദ്യോഗസ്ഥരോട് ആദ്യം വിളപ്പില്‍ശാല പൊലീസ് പറഞ്ഞത്. എന്നാല്‍ പൊലീസാണ് ആശുപത്രിയിലെത്തിച്ചതെന്ന വാദത്തില്‍ നാട്ടുകാര്‍ ഉറച്ചുനിന്നതോടെ പൊലീസ് കുഴപ്പത്തിലായി.

പല കേസുകളിലും വാറന്റ് നിലനില്‍ക്കുന്നതിനാലാണ് ബിജു ആശുപത്രിയിൽ നിന്ന് മുങ്ങിയതെന്നാണ് വിവരം. സംഭവത്തെക്കുറിച്ച് അന്വേഷിക്കുമെന്ന് നെടുമങ്ങാട് ഡിവൈഎസ്പി ബി അനില്‍കുമാര്‍ പറഞ്ഞു.