ജിഷ വധക്കേസ് പ്രതി അമീറുല്‍ ഇസ്‌ലാമിന് ലഹരിവസ്തുക്കളടങ്ങിയ പൊതി കൈമാറാൻ ശ്രമിച്ച യുവാവ് പിടിയില്‍. പ്രതിയുടെ സുഹൃത്താണ് കസ്റ്റഡിയിലായിരിക്കുന്നതെന്നാണ് സൂചന. അമീറുലിന്റെ കസ്റ്റഡി കാലാവധി അവസാനിച്ചതിനെ തുടർന്ന് എറണാകുളം ജുഡീഷ്യൽ മജിസ്ട്രേട്ട് കോടതിയിൽ എത്തിച്ചപ്പോഴാണ് നാടകീയമായ സംഭവം നടന്നത്.

പൊലീസ് സംഘത്തിനിടയിലൂടെ ഭയമില്ലാതെ കടന്നുവന്ന യുവാവ് അമീറുലിന് ഒരു പൊതി കൈമാറാന്‍ ശ്രമിക്കുകയായിരുന്നു.
ലഹരിക്ക് അടിമയായ പ്രതിക്ക് മദ്യംപോലുള്ള എന്തോ വസ്തുവാണ് സുഹൃത്ത് എത്തിച്ചത്. ഉടന്‍ തന്നെ പൊലീസ് ഈ യുവാവിനെ പിടികൂടുകയായിരുന്നു. ഇയാള്‍ മലായാളിയാണെന്നും റിപ്പോര്‍ട്ടുണ്ട്.

യുവാവിനെ സ്റ്റേഷനിലേക്ക് കൊണ്ടുപോകാൻ പൊലീസ് ശ്രമിച്ചപ്പോൾ ഇയാൾ വഴങ്ങിയില്ല. പൊലീസിനോട് മാപ്പ് പറയുകയും കാലില്‍ വീണ് മാപ്പ് പറയാനും ഇയാള്‍ ശ്രമിച്ചെങ്കിലും ബലപ്രയോഗത്തിലൂടെ ഇയാളെ പൊലീസ് ജീപ്പിൽ കയറ്റുകയായിരുന്നു. അതിനിടെ അമീറുലിന്റെ കസ്റ്റഡി കാലാവധി അടുത്തമാസം 10 വരെ നീട്ടി.