വെബ്ദുനിയ ലേഖകൻ|
Last Modified വെള്ളി, 14 ഓഗസ്റ്റ് 2020 (11:34 IST)
തിരുവനന്തപുരം: വല്ലാർപാടം വഴി യുഎഇ കോൺസലേറ്റിലേയ്ക്ക് എത്തിയ ഡിപ്ലോമാറ്റിക് കാർഗോ സംസ്ഥാന പ്രോട്ടോകോൾ വിഭാഗം അറിയാതെ കസ്റ്റംസ് ഉദ്യോഗസ്ഥർ യുഎഇ കോണ്‍സുലേറ്റിന് വിട്ടു നല്‍കി. മാർച്ച് 23ന് വല്ലാർപാടത്ത് ഡിപ്ലോമാറ്റിക് കർഗോ എത്തിയിരുന്നു. എന്നാൽ ഇത് കൈപ്പറ്റുന്നതിനായി കോണ്‍സുലേറ്റ് പ്രോട്ടോക്കോള്‍ വിഭാഗത്തിന്റെ അനുമതി തേടുകയിരുന്നില്ല. പ്രോട്ടോകോൾ ഓഫിസറുടെ സാക്ഷ്യപ്പെടുത്തലില്ലാതെ കാര്‍ഗോ കസ്റ്റംസ് വിട്ടു നല്‍കുകയായിരുന്നു
സ്വർണക്കടത്ത് കേസിൽ അന്വേഷണം ആരംഭിച്ചതോടെയാണ് ഇക്കാര്യം പ്രോട്ടോകോൾ വീഭാഗത്തിന്റെ ശ്രദ്ധയിൽപ്പെട്ടത്. നയതന്ത്ര ബാഗേജുകള്‍ വിട്ടു നല്‍കാന്‍ വേണ്ടിയുള്ള അനുമതി പത്രങ്ങളുടെ വിശദാംശങ്ങള്‍ തേടി എന്‍ഐഎയും കസ്റ്റംസും കഴിഞ്ഞ ദിവസം സംസ്ഥാന പ്രോട്ടോക്കോള്‍ വിഭാഗത്തെ സമീപിച്ചിരുന്നു. രണ്ടു വര്‍ഷത്തിനിടെ ഒരിക്കല്‍ പോലും യുഎഇ കോണ്‍സുലേറ്റ് ഡിപ്ലോമാറ്റിക് കാർഗോ സ്വീകരിയ്ക്കുന്നതിന് അനുമതി തേടിയിട്ടില്ലെന്നാണ് വിവരം. അങ്ങനെയെങ്കിൽ അനുമതിയില്ലാതെ പാഴ്സലുകൾ വിട്ടുനൽകിയ കസ്റ്റംസ് തന്നെ വെട്ടിലാകും.
