തൃശൂരില്‍ വന്‍ എടിഎം കവര്‍ച്ച. മൂന്നിടങ്ങളിലായി എടിഎമ്മുകളില്‍ നിന്നും 60 ലക്ഷം രൂപയോളമാണ് നഷ്ടമായത്. ഷൊര്‍ണൂര്‍ റോഡ്, മാപ്രാണം,കോലഴി എന്നിവിടങ്ങളിലെ എടിഎമ്മുകളില്‍ നിന്നാണ് പണം മോഷ്ടിച്ചത്. വെള്ളിയാഴ്ച പുലര്‍ച്ചെ 3 മണിക്കും 4 മണിക്കും ഇടയില്‍ കാറില്‍ മുഖം മൂടി ധരിച്ചെത്തിയ സംഘം ഗ്യാസ് കട്ടര്‍ ഉപയോഗിച്ചാണ് എടിഎമ്മില്‍ നിന്നും പണം കവര്‍ന്നത്. ഇതിന്റെ സിസിടിവി ദൃശ്യങ്ങള്‍ പോലീസ് പരിശോധിച്ചുവരികയാണ്.

ഒരേ സംഘമാണ് മൂന്നിടങ്ങളിലെയും എടിഎം കവര്‍ച്ചകള്‍ക്ക് പിന്നിലെന്നാണ് അനുമാനം. 3 വ്യത്യസ്ത സ്റ്റേഷന്‍ പരിധികളിലുള്ള എടിഎമ്മുകളിലാണ് മോഷണം നടന്നത്. വെള്ള നിറത്തിലുള്ള കാറിലാണ് മോഷ്ടാക്കള്‍ എത്തിയത്. ജില്ലയുടെ അതിര്‍ത്തികളില്‍ ഇതിനെ തുടര്‍ന്ന് കര്‍ശന പരിശോധനയാണ് പോലീസ് നടത്തുന്നത്. പ്രതികള്‍ തമിഴ്നാട്ടിലേക്ക് കടക്കാനുള്ള സാധ്യതയും പോലീസ് പരിശോധിക്കുന്നുണ്ട്.