മേജര്‍ രവി സംവിധാനം ചെയ്ത പിക്കറ്റ് 43 എന്ന സിനിമയുടെ ട്രെയിലര്‍ റിലീസ് ചെയ്തു. പൃഥ്വിരാജ് നായകനാകുന്ന സിനിമയില്‍ ജാവേദ് ജഫ്രി നായകതുല്യമായ കഥാപാത്രത്തെ അവതരിപ്പിക്കുന്നു. ഒ ജി സുനില്‍ നിര്‍മ്മിച്ച സിനിമയുടെ തിരക്കഥയും മേജര്‍ രവി തന്നെയാണ്.

ഒരു ഇന്ത്യന്‍ പട്ടാളക്കാരനും പാകിസ്ഥാന്‍ പട്ടാളക്കാരനും കശ്മീരിലെ അപകടകരമായ, മഞ്ഞുറഞ്ഞ ഒരു സ്ഥലത്ത് പെട്ടുപോകുന്നു. മറ്റാരും അവിടെയുണ്ടായിരുന്നില്ല. അവര്‍ അവിടെ അകപ്പെട്ടു എന്ന് ആരും അറിഞ്ഞതുമില്ല. മാസങ്ങളോളം അവര്‍ക്ക് അവിടെ മരണത്തോട് മല്ലിട്ട് കഴിയേണ്ടിവരുന്നു. രാജ്യങ്ങള്‍ തമ്മിലുള്ള ശത്രുത മറന്ന് മനുഷ്യസ്നേഹത്തിന്‍റെ നിമിഷങ്ങള്‍ അവിടെ പിറക്കുകയാണ്.

ഈ കഥയാണ് ‘പിക്കറ്റ് 43’ എന്ന സിനിമ പറയുന്നത്. ഇന്ത്യന്‍ പട്ടാളക്കാരനായി പൃഥ്വിരാജ് അഭിനയിക്കുമ്പോള്‍ പാക് സൈനികനായി എത്തുന്നത് ജാവേദ് ജഫ്രിയാണ്. ഈ പട്ടാളക്കഥ, ഒരു മിലിട്ടറി ഓപ്പറേഷന്‍ തലത്തിലേക്ക് ഉയരുന്ന ഒന്നല്ല. ഇത് ഇമോഷണല്‍ കണ്ടന്‍റിന് പ്രാധാന്യം നല്‍കുന്ന പ്രൊജക്ടാണ്.

സമീപകാലത്ത് പരാജയങ്ങള്‍ മാത്രം നേരിടേണ്ടിവന്ന സംവിധായകനാണ് മേജര്‍ രവി. പിക്കറ്റ് 43 വന്‍ വിജയമാകേണ്ടത് അതുകൊണ്ടുതന്നെ അദ്ദേഹത്തിന് അനിവാര്യമാണ്. പൃഥ്വിരാജാകട്ടെ, ഈ പ്രൊജക്ടിലൂടെ തന്‍റെ കരിയറിലെ വ്യത്യസ്തമായ ഒരു പരീക്ഷണത്തിനാണ് ഒരുങ്ങുന്നത്.