നടി പ്രയാഗ മാർട്ടിനെ നേരിൽ കണ്ടിട്ടുണ്ടെന്ന് കൊച്ചിയില്‍ ലഹരി കേസില്‍ അറസ്റ്റിലായ ഗുണ്ട നേതാവ് ഓം പ്രകാശ്. കൊച്ചിയിലെ ക്രൗണ്‍ പ്ലാസയിലെത്തിയാണ് ശ്രീനാഥ് ഭാസി അടക്കമുള്ള സുഹൃത്തുക്കൾ തന്നെ കണ്ടതെന്നും ഇയാൾ വ്യക്തമാക്കി. സുഹൃത്തുക്കളെ കാണാന്‍ വേണ്ടി മാത്രമായിരുന്നു ഹോട്ടലിൽ എത്തിയതെന്നും മയക്കുമരുന്നുമായി തനിക്ക് ഒരു ബന്ധമില്ലെന്നുമാണ് ഇയാൾ പറയുന്നത്. ശ്രീനാഥ് ഭാസിയെ കൂടാതെ പ്രയാഗ മാർട്ടിനെയും നേരിൽ കണ്ടുവെന്നും ഇയാൾ പറയുന്നു.

പെണ്‍കുട്ടി സിനിമതാരം പ്രയാഗ മാര്‍ട്ടിന്‍ ആണെന്ന് പിന്നീടാണ് തനിക്ക് മനസിലായത്. സിനിമയില്‍ കാണുന്ന ഭംഗി ഉണ്ടായിരുന്നില്ലെന്നും ഓംപ്രകാശ് കൂട്ടിച്ചേര്‍ത്തു. പ്രയാഗ മാര്‍ട്ടിനാണോ ആ കുട്ടി എന്നത് എനിക്കറിയില്ലെന്നും ഇയാൾ പറയുന്നു. തനിക്ക് ലഹരിയുമായി ഒരു ബന്ധവുമില്ല. കേസില്‍ തന്നെ ഫ്രെയിം ചെയ്തതാണ്. കഴിഞ്ഞ 15 ദിവസമായി ആന്റിബയോട്ടിക് കഴിക്കുന്നയാളാണ് താന്‍. തനിക്ക് ലഹരി ഉപയോഗിക്കാന്‍ കഴിയില്ല. തന്റെ റൂമില്‍ നിന്ന് ഒരു സിഗരറ്റ് കുറ്റി പോലും കണ്ടെത്തിയിട്ടില്ലെന്നും ഓം പ്രകാശ് അറിയിച്ചു.

അതേസമയം, ഓം പ്രകാശിന്റെ വെളിപ്പെടുത്തൽ പുറത്തുവന്നതോടെ മുൻപ് പ്രയാഗ പറഞ്ഞത് വാസ്തവവിരുദ്ധമായ കാര്യമാണെന്ന് സോഷ്യൽ മീഡിയ ചൂണ്ടിക്കാട്ടുന്നു. ഓം പ്രകാശ് ആരാണെന്ന് പോലും തനിക്ക് അറിയില്ലെന്നും ഓം പ്രകാശിനെ കണ്ട ഓര്‍മ പോലുമില്ലെന്നും നടി പറഞ്ഞു. ഓം പ്രകാശ് ആരാണെന്ന് ഗൂഗിൾ ചെയ്താണ് താൻ മനസിലാക്കിയതെന്നും നടി പറഞ്ഞിരുന്നു.