അഭിനയ് സേതുറാം|
Last Modified ചൊവ്വ, 21 നവം‌ബര്‍ 2017 (15:50 IST)
അമേരിക്കയുടെ ഇതിഹാസ അതിജീവന സിനിമയായ ‘കാസ്റ്റ് എവേ’ മലയാളത്തിലേക്കെന്ന് സൂചന. ടോം ഹാങ്ക്സ് അനശ്വരമാക്കിയ നായക കഥാപാത്രത്തെ നിവിന്‍ പോളിയാണ് അവതരിപ്പിക്കുക എന്നും അറിയുന്നു.
ഉള്‍ക്കടലിലും കടലാല്‍ ചുറ്റപ്പെട്ട ദ്വീപിലുമായിരിക്കും ചിത്രീകരണം. റോഷന്‍ ആന്‍ഡ്രൂസ് സംവിധാനം ചെയ്യുന്ന ഈ സിനിമയുടെ രചന ഉണ്ണി ആര്‍ നിര്‍വഹിക്കുമെന്നും റിപ്പോര്‍ട്ടുകളുണ്ട്.
2000ല്‍ പുറത്തിറങ്ങിയ കാസ്റ്റ് എവേ സംവിധാനം ചെയ്തത് റോബര്‍ട്ട് സെമെക്കിസ് ആണ്. തെക്കന്‍ പസഫിക് സമുദ്രത്തില്‍ തകര്‍ന്നുവീണ ഒരു വിമാനത്തില്‍ നിന്ന് രക്ഷപ്പെട്ട് അടുത്തുള്ള ദ്വീപില്‍ അകപ്പെടുന്ന കഥാപാത്രത്തെയാണ് ടോം ഹാങ്ക്സ് ഈ ചിത്രത്തില്‍ അവതരിപ്പിച്ചത്.
മലയാളത്തില്‍ ഇത്തരം സര്‍വൈവല്‍ ത്രില്ലറുകള്‍ വളരെ ചുരുക്കമാണ്. ‘ദൌത്യം’ പോലെയുള്ള ചില ചിത്രങ്ങള്‍ മാത്രമാണ് ആ ഗണത്തില്‍ ശ്രദ്ധേയമായിട്ടുള്ളത്. റോഷന്‍ ആന്‍ഡ്രൂസിന്‍റെ സിനിമയില്‍ അതുകൊണ്ടുതന്നെ പ്രതീക്ഷയേറുന്നു.
റോഷന്‍ ആന്‍ഡ്രൂസും നിവിന്‍ പോളിയും ഇപ്പോള്‍ ‘കായം‌കുളം കൊച്ചുണ്ണി’യുടെ തിരക്കിലാണ്. അതിന് ശേഷം കാസ്റ്റ് എവേ റീമേക്ക് ആരംഭിക്കുമെന്നാണ് റിപ്പോര്‍ട്ട്.
