2016 മലയാള സിനിമയെ സംബന്ധിച്ച് ഒരുപാട് നേട്ടങ്ങൾ സ്വന്തമാക്കാൻ കഴിഞ്ഞ വർഷമാണ്. പുലിമുരുകൻ 100 കോടി ക്ലബ്ബിൽ കയറി. മികച്ച അഭിനേതാക്കളെ ലഭിച്ചു, തുടങ്ങി നിരവധി നേട്ടങ്ങൾ. അഭിനേതാക്കളുടെ കാര്യമെടുത്താൽ മണികണ്ഠനേയും വിനായകനേയും ആർക്കും മറക്കാൻ കഴിയില്ല. മികച്ച നടനുള്ള അവാർഡുകൾ സ്വന്തമാക്കാൻ എന്തുകൊണ്ടും ഇരുവരും നൂറ് ശതമാനം കഴിവുള്ളവരാണെന്ന കാര്യത്തിൽ സോഷ്യൽ മീഡിയയ്ക്ക് സംശയമില്ല.

പോയ വര്‍ഷത്തെ മികച്ച താരങ്ങളെ കണ്ടെത്തുന്നതിനിടയില്‍ പലരും മറന്നുപോയിട്ടുണ്ട്. അക്കൂട്ടത്തിൽപ്പെടുന്നവരാണ് മണികണ്ഠനും വിനായകനും. അവരുടെ കഴിവിനെ അഭിനന്ദിക്കാന്‍ മുതിര്‍ന്ന താരങ്ങളുള്‍പ്പടെ ആരും തയ്യാറായിരുന്നില്ല. ഇവിടെയാണ് നിവിന്‍ പോളി വ്യത്യസ്തനായത്.

ജനപ്രിയ നായകനുള്ള ഏഷ്യാനെറ്റ് പുരസ്‌കാരം ഇത്തവണ ലഭിച്ചത് നിവിന്‍ പോളിക്കാണ്. പുരസ്‌കാര വേദിയില്‍ സംസാരിക്കുന്നതിനിടയിലാണ് നിവിന്‍ സഹതാരങ്ങളെയും അവാര്‍ഡ് ജേതാക്കളെയും അഭിനന്ദിച്ചത്. സഹതാരങ്ങളില്‍ പലരും ചെയ്യാന്‍ മടിക്കുന്ന കാര്യമാണ് നിവിൻ ചെയ്തത്.