സൂപ്പർഹിറ്റ് ചിത്രമായ 'വെള്ളിമൂങ്ങ'യ്ക്ക് ശേഷം ജിബു ജേക്കബ് സംവിധാനം ചെയ്യുന്ന മോഹൻലാൽ ചിത്രം 'മുന്തിരിവള്ളികൾ തളിർക്കുമ്പോളി'ലെ ആദ്യ ഗാനം പുറത്തിറങ്ങി. മധു വാസുദേവിന്റെ വരികൾക്ക് ജയചന്ദ്രൻ ആണ് ഈണമിട്ടിരിക്കുന്നത്. ജയചന്ദ്രൻ തന്നെ ആലപിച്ച പുന്നമട കായൽ എന്ന് തുടങ്ങുന്ന ഗാനമാണ് പുറത്തുവന്നിരിക്കുന്നത്.

കുടുംബപ്രേക്ഷകരെ ലക്ഷ്യംവച്ച് ഒരുക്കിയിരിക്കുന്ന സിനിമയുടെ ടീസർ പ്രേക്ഷകരെ കൈയിലെടുത്തിരിക്കുകയാണ്. കുടുംബനാഥന്റെ വേഷത്തിൽ മോഹൻലാല്‍ വീണ്ടുമെത്തുന്നു എന്ന പ്രത്യേക കൂടി ഈ ചിത്രത്തിനുണ്ട്. ദൃശ്യത്തിന് ശേഷം മോഹന്‍ലാല്‍- മീന ജോഡികള്‍ ഒന്നിക്കുന്ന ചിത്രം എന്ന പ്രത്യേകത കൂടിയുണ്ട് സിനിമയ്ക്ക്. ഐമ, കലാഭവൻ ഷാജോൺ, അനൂപ് മേനോൻ, ഷറഫുദ്ദീൻ എന്നിവരാണ് മറ്റുതാരങ്ങൾ.

പഞ്ചായത്ത് സെക്രട്ടറിയായ ഉലഹന്നാന്‍ എന്ന കഥാപാത്രത്തെയാണ് മോഹന്‍ലാല്‍ ചിത്രത്തില്‍ അവതരിപ്പിക്കുന്നത്. വി ജെ ജെയിംസിന്റെ 'പ്രണയോപനിഷത്ത്' എന്ന ചെറുകഥയെ ആധാരമാക്കി ഒരുക്കുന്നചിത്രത്തിന് എം. സിന്ധുരാജാണ് തിരക്കഥ ഒരുക്കുന്നത്. വീക്കെന്‍ഡ് ബ്ലോക്ക്ബസ്റ്റേഴ്‌സിന്റെ ബാനറില്‍ സോഫിയ പോള്‍ ആണ് നിർമാണം.