തിയറ്ററുകളിൽ മികച്ച പ്രതികരണം നേടി മുന്നേറുന്ന ദിലീപ് ചിത്രം കമ്മാരസംഭവത്തിന്റെ ട്രെയിലർ പുറത്ത്. രണ്ട് മിനിറ്റ് ദൈർഘ്യമുള്ള ട്രെയിലർ കണ്ണഞ്ചിപ്പിക്കുന്ന ദൃശ്യങ്ങളാണ് ഉള്ളത്. ദിലീപിന്റെ ഇതുവരെ കാണാത്ത ലുക്കാണ് ട്രെയിലറിന്റെ ഹൈലൈറ്റ്.

രതീഷ് അമ്പാട്ട് സംവിധാനം ചെയ്ത ചിത്രത്തിന് തിരക്കഥ മുരളി ഗോപിയാണ്. മൂന്നുകാലഘട്ടങ്ങളിലൂടെ കഥ പറഞ്ഞുപോകുന്ന സിനിമയിൽ
വ്യത്യസ്ത ഗെറ്റപ്പുകളിലാണ് ദിലീപ് എത്തുന്നത്. നേരത്തെ ചിത്രത്തിന്റെ ട്രെയിലർ ഒരെണ്ണം ഇറങ്ങിയിരുന്നു. എന്നാൽ, ട്രെയിലറും സിനിമയും തമ്മിൽ ബന്ധമില്ലെന്നും ട്രെയിലർ കണ്ട് മാസ് പടം പ്രതീക്ഷിച്ച് കയറിയവർക്ക് ഇഷ്ടമായില്ലെന്നും എല്ലാം നിരൂപണങ്ങൾ വന്നിരുന്നു.

ആദ്യം തന്നെ ചിത്രത്തിന്റെ ഒറിജിനൽ ട്രെയിലർ ഇറക്കിയാൽ പോരായിരുന്നോ എന്നാണ് ആരാധകർ ചോദിക്കുന്നത്. തമിഴ് താരങ്ങളായ സിദ്ധാർത്ഥ്, ബോബി സിംഹ എന്നിവരാണ് സിനിമയിലെ മറ്റു താരങ്ങൾ.

ഏകദേശം 20 കോടി ചെലവുള്ള സിനിമയുടെ നിർമാണം ഗോകുലം ഫിലിംസ് ആണ്. ദിലീപിന്റെ തന്നെ വിതരണ കമ്പനിയായ ഗ്രാൻഡ് പ്രൊഡക്ഷൻസ് ചിത്രം തിയറ്ററുകളിലെത്തിച്ചത്.