സൽമാൻ ഖാന്റെ സുഹൃത്തുക്കളിൽ ഒരാളാണ് ആസിഫ് ഷെയ്ഖ്. നിരവധി സിനിമകളിൽ ഇരുവരും ഒന്നിച്ചഭിനയിച്ചിട്ടുണ്ട്. ഇപ്പോഴിതാ, തങ്ങളെ ഒരിക്കൽ പോലീസ് പിടിച്ചിട്ടുണ്ടെന്ന് പറയുകയാണ് ആസിഫ്. ലാലൻടോപ്പിന് നൽകിയ അഭിമുഖത്തിലാണ് ആസിഫ് ഷെയ്ഖ് പഴയ ആ സംഭവം ഓർമിച്ചത്.

1998 ലായിരുന്നു സംഭവം. ആ വർഷം പുറത്തിറങ്ങിയ ബന്ധൻ എന്ന ചിത്രത്തിൽ സൽമാൻ ഖാനൊപ്പം ആസിഫ് ഷെയ്ഖും അഭിനയിച്ചിരുന്നു.സൽമാൻ ഖാന് അന്നൊരു മാരുതി എസ്റ്റീം കാറുണ്ടായിരുന്നു. ഷൂട്ടിങ്ങിന്റെ ഇടവേളകളൊന്നിൽ ആസിഫിനേയും ഒപ്പമിരുത്തി സൽമാൻ ഖാൻ ഒരു ഡ്രൈവിന് പോയി. ഫൂട്പാത്തുകൾ തിരഞ്ഞുപിടിച്ച് സൽമാൻ ഖാൻ വണ്ടിയോടിക്കാൻ തുടങ്ങി. പോലീസ് പിടിക്കുമെന്ന് കേണപേക്ഷിച്ചെങ്കിലും പുള്ളി കേട്ടില്ലെന്ന് ആസിഫ് പറയുന്നു.

അഥവാ പിടിച്ചാലും സൽമാൻ ഖാനാണ് ഒപ്പമിരിക്കുന്നതെന്നും വണ്ടിയോടിക്കുന്നതെന്നും എന്ന ഭാവമായിരുന്നു അദ്ദേഹത്തിനെന്നാണ് ആസിഫ് ഓർക്കുന്നത്. "കാറിന്റെ ​ഗ്ലാസ് സൽമാൻ താഴ്ത്തിവെച്ചിരുന്നെങ്കിലും ട്രാഫിക് പോലീസിന് അദ്ദേഹത്തെ മനസിലായില്ല. തന്നെ പോലീസിന് മനസിലായില്ല എന്നാണ് തോന്നുന്നതെന്ന് സൽമാൻ പറഞ്ഞു. എന്നിരുന്നാലും പോലീസ് പിടിച്ചു', ആസിഫ് പറഞ്ഞു.