ജീവിതത്തില്‍ വിവാഹം വേണ്ടെന്ന തീരുമാനം താന്‍ ആലോചിച്ചെടുത്ത ഒന്നാണെന്ന് നടി ഐശ്വര്യ ലക്ഷ്മി. ചിന്തിക്കാനും ചുറ്റിലുമുള്ള വിവാഹബന്ധങ്ങള്‍ കാണാനും തുടങ്ങിയതോടെയാണ് ഇത്തരത്തിലൊരു തിരിച്ചറിവിലേക്ക് താന്‍ എത്തിയതെന്നും ഐശ്വര്യ ലക്ഷ്മി പറഞ്ഞു. പുതിയ സിനിമയായ ഹലോ മമ്മിയുടെ പ്രമോഷന്റെ ഭാഗമായി ധന്യവര്‍മയുടെ യൂട്യൂബ് ചാനലുമായുള്ള അഭിമുഖത്തില്‍ സംസാരിക്കുകയായിരുന്നു ഐശ്വര്യ ലക്ഷ്മി.

കല്യാണമെന്ന ഇന്‍സ്റ്റിറ്റിയൂഷനില്‍ ഞാന്‍ വിശ്വസിക്കുന്നില്ല. ഇത് ഏറെ ആലോചിച്ച് എടുത്ത തീരുമാനമാണ്. എട്ടാമത്തെയോ ഒന്‍പതാമത്തെയോ എന്തിന് 25,26 വയസില്‍ പോലും ഗുരുവായൂര്‍ അമ്പലത്തില്‍ താലിക്കെട്ടണം, തുളസിമാല വേണമെന്നുമെല്ലാം ആഗ്രഹമുണ്ടായിരുന്നു. എന്നാലത് എന്നില്‍ അടിച്ചേല്‍പ്പിച്ച ഒന്നായിരുന്നു. അമ്മ ഭക്തയായിരുന്നതിനാല്‍ എല്ലാ മാസവും ഗുരുവായൂര്‍ അമ്പലത്തില്‍ പോകുമായിരുന്നു. അവിടെ കണ്ട കല്യാണങ്ങളില്‍ നിന്നാണ് ഇങ്ങനൊരു ആഗ്രഹമുണ്ടായത്.

എന്നാല്‍ വലുതായി ചിന്തിക്കാന്‍ തുടങ്ങുകയും ചുറ്റുമുള്ള വിവാഹങ്ങള്‍ കാണുകയും ചെയ്തപ്പോള്‍ ആളുകള്‍ സന്തോഷവാന്മാരല്ലെന്ന് കാണാന്‍ തുടങ്ങി. എന്റെ 34 വയസിനിടെ വിവാഹം കഴിഞ്ഞും സന്തോഷത്തോടെ ഇരിക്കുന്ന ഒരേയൊരു കുടുംബത്തെ മാത്രമാണ് കണ്ടത്. അവര്‍ ഒരു മലയാളി കുടുംബമല്ല. അവര്‍ക്ക് എങ്ങനെ സാധിച്ചു എന്നറിയില്ല. ബാക്കിയെല്ലാവരും വിട്ടുവീഴ്ച ചെയ്യുന്നവരും ബുദ്ധിമുട്ടുകളിലുമാണ്. വ്യക്തിപരമായി വളര്‍ച്ചയില്ല. ആ ബോധ്യം വന്നപ്പോള്‍ വിവാഹം എനിക്ക് ആവശ്യമായ ഒന്നല്ലെന്ന് മനസിലാക്കി ഐശ്വര്യ ലക്ഷ്മി പറയുന്നു.