മെല്‍‌ബണ്‍|
Last Updated:
തിങ്കള്‍, 18 ജനുവരി 2016 (17:45 IST)
വെസ്റ്റിന്‍ഡീസ് ബാറ്റിംഗ് ഇതിഹാസം ക്രിസ് ഗെയ്‌ല്‍ വീണ്ടും വാര്‍ത്തകളില്‍ നിറയുകയാണ്. ഇത്തവണ പക്ഷേ വിവാദങ്ങളൊന്നുമല്ല, നല്ല വാര്‍ത്ത തന്നെ. ട്വന്‍റി20യില്‍ ഏറ്റവും വേഗത്തില്‍ അര്‍ദ്ധസെഞ്ച്വറിയടിച്ചാണ് ഗെയ്‌ല്‍ റെക്കോര്‍ഡിട്ടിരിക്കുന്നത്.
ഓസ്ട്രേലിയന്‍ ബിഗ് ബാഷ് ലീഗിലാണ് ക്രിസ് ഗെയ്‌ലിന്‍റെ ഈ അസാധാരണ പ്രകടനം. വേഗമേറിയ അര്‍ദ്ധസെഞ്ച്വറിയുടെ കാര്യത്തില്‍ ഇതോടെ ഇന്ത്യയുടെ യുവരാജ് സിംഗിനൊപ്പമെത്തിയിരിക്കുകയാണ് ക്രിസ് ഗെയ്‌ല്‍. 2007ല്‍ ഇംഗ്ലണ്ടിനെതിരെയായിരുന്നു യുവരാജ് ഈ റെക്കോര്‍ഡ് സ്ഥാപിച്ചത്.
എതിഹാഡ് സ്റ്റേഡിയത്തിന്‍റെ നാലുപാടും അഡലൈഡ് സ്ട്രൈക്കേഴ്സിന്‍റെ ബൌളര്‍മാരെ തല്ലിയകറ്റിയാണ് ക്രിസ് ഗെയ്‌ല്‍ റെക്കോര്‍ഡിട്ടത്. 17 പന്തുകളില്‍ 56 റണ്‍സ് എത്തിനില്‍ക്കെ ക്രിസ് ഗെയ്‌ല്‍ ഔട്ടായി. ട്രാവിസ് ഹെഡിന് ക്യാച്ച് നല്‍കിയായിരുന്നു ഗെയ്‌ലിന്‍റെ മടക്കം.
30 പന്തുകളില്‍ നിന്ന് സെഞ്ച്വറി നേടീ ഏറ്റവും വേഗമേറിയ സെഞ്ച്വറിയെന്ന റെക്കോര്‍ഡ് സ്വന്തം പേരില്‍ കുറിച്ച താരമാണ് ക്രിസ് ഗെയ്‌ല്‍.
