Last Modified ബുധന്‍, 15 ജൂലൈ 2015 (18:34 IST)
ബോഡി ഗാര്‍ഡിന് ശേഷം ദിലീപും നയന്‍‌താരയും ഒരുമിക്കുന്നതായി റിപ്പോര്‍ട്ടുകള്‍. ജീത്തു ജോസഫ് സംവിധാനം ചെയ്യുന്ന ലൈഫ് ഓഫ് ജോസൂട്ടി എന്ന ദിലീപ് ചിത്രത്തിലാണ് നയന്‍സ് ഒരു സുപ്രധാന കഥാപാത്രത്തെ അവതരിപ്പിക്കുന്നത്. തൊടുപുഴയിലെ വാഴക്കുളത്ത് നയന്താരയുടെ രംഗങ്ങള്‍ അതീവരഹസ്യമായി ചിത്രീകരിച്ചതായാണ് വിവരം.
സിനിമാലോകത്തുപോലും അധികമാരും അറിയാതെയാണ് നയന്‍‌താര തൊടുപുഴയിലെത്തി ചിത്രത്തില്‍ അഭിനയിച്ചുമടങ്ങിയതത്രേ. ഈ രംഗങ്ങള്‍ ചിത്രീകരിക്കുമ്പോള്‍ യൂണിറ്റ് അംഗങ്ങളെയല്ലാതെ മറ്റാരെയും ചിത്രീകരണസ്ഥലത്തേക്ക് പ്രവേശിപ്പിച്ചില്ല. കനത്ത സുരക്ഷാസംവിധാനങ്ങളാണ് നയന്താരയുടെ രംഗങ്ങള്‍ ചിത്രീകരിക്കുമ്പോള്‍ ഏര്‍പ്പെടുത്തിയിരുന്നതെന്നും വിവരമുണ്ട്.
ഒരു സര്‍പ്രൈസ് കഥാപാത്രത്തെയാണ് ലൈഫ് ഓഫ് ജോസൂട്ടിയില്‍ നയന്‍‌താര അവതരിപ്പിക്കുക. ജ്യോതികൃഷ്ണയും രചന നാരായണന്‍‌കുട്ടിയുമാണ് ഈ സിനിമയിലെ നായികമാര്‍. അതുകൊണ്ടുതന്നെ നയന്താരയുടെ കഥാപാത്രം എന്തായിരിക്കുമെന്ന ആകാംക്ഷ പ്രേക്ഷകരില്‍ ഉണര്‍ന്നിട്ടുണ്ട്.
ദൃശ്യത്തിനുശേഷം എത്തുന്ന സിനിമ എന്ന നിലയില്‍ ഏറെ പ്രതീക്ഷയോടെയാണ് ലൈഫ് ഓഫ് ജോസൂട്ടിക്കായി ഏവരും കാത്തിരിക്കുന്നത്.
