ഇക്കഴിഞ്ഞ ചൊവ്വാഴ്ചയാണ് നടനും സംഗീത സംവിധായകനായ വിജയ് ആന്റണിയുടെ പ്ലസ് ടു വിദ്യാര്‍ഥിനിയായ മകള്‍ മീര(16) യെ കിടപ്പുമുറിയില്‍ തൂങ്ങി മരിച്ച നിലയില്‍ കണ്ടെത്തിയത്. ഉടന്‍ തന്നെ ആശുപത്രിയിലെത്തിച്ചെങ്കിലും മീരയുടെ ജീവന്‍ രക്ഷിക്കാനായിരുന്നില്ല. ബുധനാഴ്ച ചെന്നൈയില്‍ വെച്ച് നടന്ന മകളുടെ സംസ്‌കാരചടങ്ങില്‍ പങ്കെടുക്കാനും വിജയ് ആന്റണിയെ ആശ്വസിപ്പിക്കാനുമായി തമിഴ് സിനിമാലോകത്തെ നിരവധി പേര്‍ സംസ്‌കാരചടങ്ങില്‍ പങ്കെടുത്തിരുന്നു. ഇപ്പോഴിതാ മകളുടെ മരണവാര്‍ത്തയ്ക്ക് ശേഷം ആദ്യമായി പ്രതികരണം നടത്തിയിരിക്കുകയാണ് വിജയ് ആന്റണി.

ഫെയ്‌സ്ബുക്കിലൂടെ ഏറെ വികാരധീനമായ കുറിപ്പാണ് താരം പങ്കുവെച്ചത്. മകള്‍ക്കൊപ്പം തന്നെ താനും മരിച്ചുകഴിഞ്ഞതായും ഇപ്പോഴും മീര തന്നോട് സംസാരിക്കാറുണ്ടെന്ന് തോന്നുന്നുവെന്നും ഇനിയുള്ള എല്ലാ നല്ല പ്രവര്‍ത്തിയും മകളുടെ പേരില്‍ ആകുമെന്നും വിജയ് ആന്റണി കുറിച്ചു. വിജയ് ആന്റണി പങ്കുവെച്ച ഫെയ്‌സ്ബുക്ക് കുറിപ്പ് ഇങ്ങനെ

എന്റെ പ്രിയപ്പെട്ടവരെ, ധൈര്യശാലിയും ദയയുള്ളവളുമായിരുന്നു എന്റെ മകള്‍ മീര. അവള്‍ ഇപ്പോള്‍ മതമോ,ജാതിയോ,പണമോ,ദാരിദ്ര്യമോ,തിന്മയോ,വേദനയോ,അസൂയയോ ഇല്ലാത്ത മറ്റൊരിടത്തേക്ക് യാത്രയായി. ഇപ്പോഴും അവള്‍ എന്നോട് സംസാരിക്കാറുണ്ടെന്ന് തോന്നു. അവള്‍ക്കൊപ്പം ഞാനും മരിച്ചുകഴിഞ്ഞു. ഇപ്പോള്‍ അവള്‍ക്കൊപ്പം സമയം ചിലവഴിക്കാന്‍ തുടങ്ങിയിരിക്കുന്നു. ഞാന്‍ തുടങ്ങുന്ന ഏത് നല്ല പ്രവൃത്തിയും അവളുടെ പേരില്‍ ആയിരിക്കും. എല്ലാം ആരംഭിക്കുന്നത് അവളായിരിക്കുമെന്നും വിശ്വസിക്കുന്നു.