മിഷോങ് ചുഴലിക്കാറ്റ് ചെന്നൈയെയും തമിഴ്നാട്ടിലെ ഏതാനും വടക്കന്‍ ജില്ലകളെയും വെള്ളത്തിനടിയിലാക്കി. ഡിസംബര്‍ 4 ന് പെയ്ത കനത്ത മഴയെ തുടര്‍ന്നാണ് പല പ്രദേശങ്ങളും വെള്ളത്തിനടിയിലായത്.തമിഴ് സിനിമാ താരങ്ങളായ സൂര്യയും കാര്‍ത്തിയും സര്‍ക്കാരിന് പിന്തുണയുമായി രംഗത്തെത്തിയിരിക്കുകയാണ്.

നടന്മാരായ സൂര്യയും കാര്‍ത്തിയും 10 ലക്ഷം രൂപ ധനസഹായം നല്‍കി.ചെന്നൈ, ചെങ്കല്‍പട്ട്, കാഞ്ചീപുരം, തിരുവള്ളൂര്‍ എന്നിവയുള്‍പ്പെടെ 4 ജില്ലകളിലാണ് മിഷോങ് ചുഴലിക്കാറ്റ് നാശം വിതച്ചത്. വെള്ളപ്പൊക്കത്തില്‍ ദുരിതമനുഭവിക്കുന്ന ആളുകള്‍ക്ക് ദൈനംദിന ആവശ്യങ്ങള്‍ക്ക് വേണ്ട സാധനങ്ങള്‍ ഫാന്‍ ക്ലബ്ബുകളിലൂടെയും സൂര്യയും കാര്‍ത്തിയും എത്തിച്ചു നല്‍കുന്നുണ്ട്.

സൂര്യയ്ക്കും കാര്‍ത്തിക്കും പിന്നാലെ തമിഴ്നാട് സര്‍ക്കാരിനും ജനങ്ങള്‍ക്കും പിന്തുണയുമായി നിരവധി താരങ്ങള്‍ എത്തുമെന്ന് പ്രതീക്ഷിക്കുന്നു.

സൂര്യ ഇപ്പോള്‍ ശിവ സംവിധാനം ചെയ്യുന്ന 'കങ്കുവ'യുടെ തിരക്കിലാണ്.