രേണുക വേണു|
Last Modified തിങ്കള്‍, 19 ഓഗസ്റ്റ് 2024 (21:05 IST)
രോമാഞ്ചം, ഗുരുവായൂരമ്പല നടയില്‍, വാഴ എന്നീ ചിത്രങ്ങളിലെ പ്രകടനങ്ങളിലൂടെ പ്രേക്ഷകരുടെ പ്രിയങ്കരനായ ജോമോന്‍ ജ്യോതിര്‍ നായകനാവുന്നു. എബ്രിഡ് ഷൈനിന്റെ തിരക്കഥയില്‍ ജിബു ജേക്കബ് സംവിധാനം ചെയ്യുന്ന 'റഫ് ആന്‍ഡ് ടഫ് ഭീകരന്‍' എന്ന ചിത്രത്തിലൂടെയാണ് ജോമോന്‍ നായകനായി അരങ്ങേറുന്നത്.
ജെ ആന്‍ഡ് എ സിനിമാ ഹൗസിന്റെ ബാനറില്‍ എബ്രിഡ് ഷൈനും ജിബു ജേക്കബ്ബും ചേര്‍ന്നാണ് ചിത്രം നിര്‍മിക്കുന്നത്. ചിത്രത്തിന്റെ ടൈറ്റില്‍ പോസ്റ്റര്‍ ഇതിനോടകം സോഷ്യല്‍ മീഡിയയില്‍ ചര്‍ച്ചയായിട്ടുണ്ട്.
1983 എന്ന സൂപ്പര്‍ ഹിറ്റ് നിവിന്‍ പോളി ചിത്രത്തിലൂടെ സംവിധായകനായി അരങ്ങേറ്റം കുറിച്ച എബ്രിഡ് ഷൈന്‍ പിന്നീടൊരുക്കിയ ചിത്രങ്ങളാണ് ആക്ഷന്‍ ഹീറോ ബിജു, പൂമരം, ദി കുങ്ഫു മാസ്റ്റര്‍, മഹാവീര്യര്‍ എന്നിവ. മലയാളത്തിലെ പ്രശസ്ത ഛായാഗ്രാഹകനായ ജിബു ജേക്കബ് സംവിധായകനായി അരങ്ങേറ്റം കുറിച്ചത് ബ്ലോക്ക്ബസ്റ്റര്‍ ഹിറ്റായി മാറിയ വെള്ളിമൂങ്ങ എന്ന ബിജു മേനോന്‍ ചിത്രത്തിലൂടെയാണ്. അതിനുശേഷം, മുന്തിരി വള്ളികള്‍ തളിര്‍ക്കുമ്പോള്‍, ആദ്യരാത്രി, എല്ലാം ശരിയാകും, മേം ഹൂ മൂസ എന്നീ ചിത്രങ്ങളും സംവിധാനം ചെയ്തു.
ജിബു ജേക്കബും എബ്രിഡ് ഷൈനും ആദ്യമായി ഒന്നിക്കുന്ന ഈ ചിത്രത്തിന്റെ ടൈറ്റില്‍ പോസ്റ്റര്‍ ഡിസൈന്‍ ചെയ്തിരിക്കുന്നത് ആള്‍ട്ടര്‍ ഈഗോ ടീമാണ്. ചിത്രത്തിന്റെ കൂടുതല്‍ വിവരങ്ങള്‍ ഇപ്പോള്‍ പുറത്ത് വിട്ടിട്ടില്ല.
