വിടര്‍ന്ന കണ്ണുകളും, അഴകാര്‍ന്ന മുഖവുമുള്ള ബോബി എന്ന ഡിംപിള്‍ കപാഡിയയുടെ ജന്മദിനമാണ് ജൂണ്‍ എട്ട്. അതുവരെയുണ്ടായിരുന്ന സിനിമാ സങ്കല്പങ്ങളുടെ പൊളിച്ചെഴുത്തുമായാണ് ബോബി അരങ്ങിലെത്തിയത്.
മുപ്പത് വര്‍ഷങ്ങള്‍ക്ക് മുന്‍പ് ബോബി തരംഗം സൃഷ്ടിച്ച അലയൊലികള്‍ അന്നത്തെ യുവത്വത്തിന്‍റെ മനസ്സില്‍ ഇന്നും പൂര്‍ണ്ണമായി കെട്ടടങ്ങിയിട്ടില്ല. ആദ്യ സിനിമയിലൂടെ തന്നെ സൂപ്പര്‍ നായികയായി ഡിംപിള്‍ മാറി. ഒപ്പം മികച്ച നടിക്കുള്ള അവാര്‍ഡും ആ പതിനാറുകാരിയെത്തേടിയെത്തി.
തുടര്‍ന്നുള്ള വര്‍ഷങ്ങള്‍ നടിയെന്ന നിലയില്‍ സജീവമാകാതെ രാജേഷ് ഖന്നയുടെ ഭാര്യയായും രണ്ട് പെണ്‍കുട്ടികളുടെ അമ്മയായുമൊക്കെ കുടുംബജീവിതത്തില്‍ ഒതുങ്ങുകയായിരുന്നു ഡിംപിള്‍. ഇടയ്ക്കിടെ സിനിമാതട്ടകത്തില്‍ മുഖം കാണിയ്ക്കുകയും ചെയ്തു.
എണ്‍പതുകളുടെ പകുതിയോടെ ഡിംപിള്‍ സജീവ സിനിമാ ജീവിതത്തിലേയ്ക്ക് മടങ്ങി വന്നു. 12 വര്‍ഷം നീണ്ട ദാമ്പത്യ ബന്ധം അപ്പോഴേയ്ക്കും തകര്‍ന്നിരുന്നു.
രമേഷ് സിപി അണിയിച്ചൊരുക്കിയ സാഗര്‍ ആയിരുന്നു രണ്ടാം വരവിന് കളമൊരുക്കിയത്. ഡിംപിള്‍ - ഋഷി കപൂര്‍ താരജോഡിക്കൊപ്പം കമലഹാസനും വേഷമിച്ച ആ ചിത്രം ഡിംപിളനെ ഏറെ പ്രശസ്തയാക്കി.
