കുത്തിയോട്ടത്തിന്‍റെ അനുഷ്ഠാനങ്ങള്‍ക്ക് നരബലിയോട് സാദൃശ്യമുണ്ട്. രോഗ ദേവതകള്‍ക്ക് നരബലിയിലൂടെ മനുഷ്യ രക്തം നല്‍കി പ്രീതിപ്പെടുത്തുന്ന സമ്പ്രദായം പണ്ടു മുതല്‍ക്കേ ഉണ്ടായിരുന്നതാണ്. അതിന്‍റെ തുടര്‍ച്ചയാണ് കുത്തിയോട്ടം. ഇവിടെ നരബലി നടക്കുന്നില്ല എന്ന് മാത്രം. ചൂരല്‍ കുത്തിലൂടെ രക്തം കൊടുത്ത് ദേവിയെ പ്രീതിപ്പെടുത്തുന്നുണ്ട്.
കുത്തിയോട്ടത്തിന് തയ്യാറാവുന്ന കുട്ടിയുടെ കഴുത്തില്‍ അണിയിക്കുന്ന ചുവന്ന മാല, ഘോഷയാത്രയോടൊപ്പം കൊണ്ടു പോകുന്ന മഞ്ഞളും ചുണ്ണാമ്പും കലക്കിയ ചുവന്ന വെള്ളം (ഇത് രക്തത്തെ സൂചിപ്പിക്കുന്നു) എന്നിവയും കുത്തിയോട്ടത്തിന് നരബലിയോടുള്ള സാദൃശ്യം ബലപ്പെടുത്തുന്നു.
മനുഷ്യന് സാംസ്കാരികവും ബുദ്ധിപരവുമായി ഉണ്ടായ ഉയര്‍ച്ച നരബലി പോലുള്ള അനാചാരങ്ങള്‍ ഇല്ലാതാക്കി. എന്നാലും സമൂഹത്തിലും മനസ്സിലും ഉറച്ചുപോയ ഇതിന്‍റെ ശേഷിപ്പുകള്‍ അനുഷ്ഠാനങ്ങളിലൂടെ ഇന്നും തുടര്‍ന്ന് പോരുന്നു.
