സ്റ്റാര്‍ സിംഗര്‍ ഫെയിം സന്നിധാനന്ദന് വിവാഹം

കോട്ടയം| WEBDUNIA|

PRO

ഏഷ്യാനെറ്റ് പ്രക്ഷേപണം ചെയ്ത ‘സ്റ്റാര്‍ സിംഗര്‍’ റിയാലിറ്റി ഷോയിലൂടെ മലയാളികളുടെ മനം‌കവര്‍ന്ന ഗായകന്‍ സന്നിദാനന്ദന്‍ വിവാഹിതനാകുന്നു. കോട്ടയം പനച്ചിക്കാട്ട്‌ വെള്ളിയാത്തേല്‍ രാജന്റെയും രാജമ്മയുടെയും മകളായ ആഷയാണ് വധു. സന്നിദാനന്ദന്റെ ഇഷ്ടദൈവമായ ‘ലോകരത്തിക്കാവ് ഭഗവതി’യുടെ ക്ഷേത്ര നടയ്ക്കല്‍ വച്ച് ഏപ്രില്‍ ഒമ്പതിനാണ് വിവാഹം നടക്കുക.

സ്പെഷല്‍ എഡ്യുക്കേഷനില്‍ ബിരുദമെടുത്തു വടക്കാഞ്ചേരി ബിആര്‍സിക്കു കീഴിലുള്ള സ്കൂളില്‍ അധ്യാപികയാണ്‌ ആഷയിപ്പോള്‍. നെടുങ്കുന്നം കോളജില്‍ ബിരുദപഠനം നടത്തുമ്പോഴാണ് സന്നിധാനന്ദന്‍ കോളജിലെ യുവജനോത്സവത്തിന് ഗാനമേള അവതരിപ്പിക്കാന്‍ എത്തിയത്. സന്നിധാനന്ദന്റെ ‘ഫാന്‍’ ആയിരുന്ന ആഷ പരിചയപ്പെടാന്‍ എത്തി. ആ പരിചയമാണ് ഇപ്പോള്‍ വിവാഹത്തില്‍ കലാശിക്കാന്‍ പോകുന്നത്.

തയ്യൂര്‍ ചെങ്ങഴിക്കോട്‌ നാരായണന്റെയും തങ്കമണിയുടെയും മകനാണ് സന്നിധാനന്ദന്‍. പാവപ്പെട്ട കുടുംബത്തില്‍ ജനിച്ചുവളര്‍ന്ന സന്നിധാനന്ദന്‍ ഏറെ കഷ്ടതകള്‍ക്കിടയില്‍നിന്നാണ്‌ ഏഷ്യാനെറ്റിലെ സ്റ്റാര്‍ സിംഗര്‍ റിയാലിറ്റിഷോയില്‍ എത്തിപ്പെട്ടത്. സന്നിദാനന്ദന്റെ പാടാനുള്ള കഴിവും എളിമ നിറഞ്ഞ പെരുമാറ്റവും സ്റ്റാര്‍ സിംഗര്‍ എന്ന റിയാലിറ്റി ഷോയെ മലയാളികള്‍ക്ക് പ്രിയപ്പെട്ടതാക്കി.

ഇതിനകം, നിരവധി സിനിമാഗാനങ്ങള്‍ ആലപിച്ചുകഴിഞ്ഞിട്ടുണ്ട് സന്നിധാനന്ദന്‍. ആദ്യഗാനം മോഹന്‍ സിതാരയുടെ സംഗീതസംവിധാനത്തില്‍ സ്വര്‍ണം എന്ന ചിത്രത്തിലെ ചന്ദ്രശേഖര നന്ദന എന്ന ഗാനമാണ്‌. എം ജയചന്ദ്രന്‍ സംഗീതം നല്‍കിയ ലിവിംഗ്‌ ടുഗെതര്‍ എന്ന ചിത്രത്തിലെ ഗാനവും തമിഴില്‍ റോണി റാഫേല്‍ സംഗീതം ചെയ്ത ആര്‍വം എന്ന ചിത്രത്തിലെ ഗാനവുമാണ്‌ ഏറ്റവും പുതിയത്‌. ഇടയ്ക്ക്‌ ഒരു ടിവി പരമ്പരയിലും സന്നിധാനന്ദന്‍ അഭിനയിച്ചിട്ടുണ്ട്.