സ്പെയിനിലെ രസകരമായ ഈ ഉത്സവം നമ്മുടെ നാട്ടിലെ ദസറ ആഘോഷത്തിനെ അനുസ്മരിപ്പിച്ചേക്കും. ഹോഗ്യൂറാസ് ഡി സന്‍ ജുവാന്‍ എന്ന സ്പാനിഷ് ഉത്സവത്തിന്‍റെ അവസാനം കൂറ്റന്‍ പ്രതിമകളും മറ്റും കത്തിക്കുന്നത് കാണുമ്പോഴാണ് നമ്മുടെ മനസ്സില്‍ ഈ സാമ്യം വന്ന് എത്തി നോക്കുന്നത്.
PRATHAPA CHANDRAN|
സ്പെയിന് എന്ന് കേള്‍ക്കുമ്പോള്‍, തല കുനിച്ച്, ചുരമാന്തി അക്രമാസക്തനായി പോരിനു തയ്യാറെടുക്കുന്ന കൂറ്റന്‍ കാളയെയാവും നാം ഓര്‍ക്കുക. സ്പെയിനിന്‍റെ ആഘോഷമായി കാളപ്പോരിനെ കാണാമെങ്കിലും ജൂണ്‍ മാസത്തില്‍ നടക്കുന്ന ഹോഗ്യൂറാസ് ഉത്സവത്തിന്‍റെ ചായക്കൂട്ടുകള്‍ക്കും കടുപ്പമേറെയാണ്.
സ്പെയിനിലെ അലികാന്റെ എന്ന മൂന്നാമത്തെ വലിയ നഗരത്തില്‍ ഹോഗ്യൂറാസ് ഉത്സവം വളരെ വിപുലമായാണ് ആഘോഷിക്കുന്നത്. അലികാന്‍റയില്‍ മറ്റേതൊരു ഉത്സവത്തിനെക്കാളും ഇതിന് പ്രാധാന്യമുണ്ട്.
ഉത്സവ രാവുകളില്‍ നടക്കുന്ന തെരുവു ഘോഷയാത്രകള്‍ കാണാന്‍ തടിച്ചു കൂടുന്നവരാണ് ഏറെയും. വിദേശികളെ കൂടുതല്‍ ആകര്‍ഷിക്കുന്നതും ഇതു തന്നെ. സുന്ദരികളായ സ്പാനിഷ് യുവതികള്‍ വിവിധ വേഷവിധാനത്തോടെ ഘോഷയാത്രയെ ചൂടുള്ള ഒരു അനുഭവമാക്കി മാറ്റുന്നു.
