മുലപ്പാല് കുഞ്ഞിന്റെ ജന്മാവകാശമാണ്. അതില് കൈ കടത്താന് ആരും വളര്ന്നിട്ടില്ല. എന്നാല് അമ്മയുടെ മുലപ്പാല് ‘മോള്’ മാത്രം രുചിച്ചാല് പോരെന്ന നിലപാടാണ് ബ്രിട്ടണിലെ വീട്ടമ്മയായ അബി ബ്ലേക്കിന്. എന്നാല് അധികമായി വരുന്ന മുലപ്പാല് പാല് കുറവുള്ള അമ്മമാരുടെ കുട്ടികള്ക്ക് കൊടുക്കുകയൊന്നുമല്ല അബി ചെയ്യുന്നത്. വീട്ടിലുണ്ടാക്കുന്ന ഭക്ഷണത്തിന് രുചി കൂട്ടാന് അതില് ചേര്ക്കുകയാണ് അബിയുടെ പതിവ്.
അബിയുടെ പെണ്കുഞ്ഞിന് പ്രായം എട്ടുമാസം. അമ്മയുടെ കള്ളിപ്പെണ്ണിന് മാത്രമുള്ളതല്ല ഈ പാല് എന്നാണ് മകളോടുള്ള അബിയുടെ ഭാഷ്യം. അമ്മയും അച്ഛനും വീട്ടുകാരും ഒക്കെ ഈ മഹത്തായ മുലപ്പാല് രുചി ഒന്നാസ്വദിക്കട്ടെ എന്ന പക്ഷം.
വീട്ടുകാരെ മാത്രമല്ല മുലപ്പാലിന്റെ മായികരുചിയില് അബി മയക്കിയിരിക്കുന്നത്. ചില ഭക്ഷണങ്ങളില് രുചി കൂട്ടാന് തേങ്ങാപ്പാല് ഉപയോഗിക്കാറില്ലേ? അതുപോലെയാണ് അബിക്ക് മുലപ്പാലും. ഏതായാലും അബിയുടെ ഈ പുതിയ ഐറ്റത്തിന് വന് സ്വീകരണമാണ് ലഭിച്ചിരിക്കുന്നതെന്നാണ് സണ് ദിനപത്രം റിപ്പോര്ട്ട് ചെയ്തിരിക്കുന്നത്.
സാധാരണ പശുവിന് പാല്, ആട്ടിന് പാല് എന്നിവയിലില്ലാത്ത പല പോഷകങ്ങളും മുലപ്പാലില് അടങ്ങിയിട്ടുണ്ട്. അതുകൊണ്ടുതന്നെ ഈ വിഭവങ്ങള് ആരോഗ്യദായകമാണെന്നാണ് അബിയുടെ വാദം. വലിയ വൃത്തിയില്ലാത്ത പശുവിന്റെ പാലിനേക്കാള് നല്ലതല്ലേ മനുഷ്യന്റെ പാല് എന്നും അബിയില് നിന്ന് ചോദ്യമുയരുന്നു.
എന്നാല്, ഈ ബുദ്ധി അബിക്ക് സ്വയം ഉണ്ടായതൊന്നുമല്ല. ഇന്ത്യയില് നിന്നാണ് അബി ഈ വിദ്യ പഠിച്ചത്. നോക്കണേ നമ്മള് ഇന്ത്യക്കാരുടെ ഒരു കാര്യം. എന്നോ ഒരിക്കല് കുറച്ചു കാലം ഇവര് ഇന്ത്യയില് താമസിച്ചിരുന്നത്രേ, അപ്പോള് കിട്ടിയതാണ് ഈ സൂപ്പര് ടേസ്റ്റ്.