ആഗോളതലത്തിൽ ആശങ്കയുയർത്തി യുഎസ് പണപ്പെരുപ്പ നിരക്കുകൾ കുതിക്കുന്നു. ഉപഭോക്തൃ വില സൂചിക 40വര്‍ഷ ചരിത്രത്തിലെ ഉയര്‍ന്നനിരക്കാണ് രേഖപ്പെടുത്തിയത്. ഇതോടെ യുഎസ് ഫെഡറൽ റിസർവ് പണനയത്തിൽ മാറ്റം വരുത്താൻ സാധ്യതയേറി.

യുഎസ് തൊഴിൽ വകുപ്പിന്റെ കണക്ക് പ്രകാരം 2020നവംബറിനുശേഷം ഉപഭോക്തൃ വില സൂചിക 6.8ശതമാനമാണ് ഉയര്‍ന്നത്. ഇന്ധനം,ഭക്ഷണം,താമസം വാഹനം എന്നിങ്ങനെയെല്ലാത്തിനും വില ഉയർന്നതിനാൽ ആഗോളതലത്തിൽ തന്നെ കേന്ദ്രബാങ്കുകൾ സമ്മർദ്ദത്തിലാണ്. ഇതോടെ ഫെഡറല്‍ റിസര്‍വിന്റെ ഈ വര്‍ഷത്തെ അവസാന യോഗത്തില്‍ ബോണ്ട് തിരികെവാങ്ങല്‍ പദ്ധതി വേഗത്തിലാക്കാനുള്ള തീരുമാനമെടുത്തേക്കും.

വിലക്കയറ്റം ഉയർന്നതോടെ കൊവിഡ് ഉത്തേജനപാക്കേജുകൾ പലിശ നിരക്ക് ഉയര്‍ത്തി ഘട്ടംഘട്ടമായി പിന്‍വലിക്കാന്‍ നിര്‍ബന്ധിതമാകുന്ന സാഹചര്യമാണുള്ളത്. 1982ൽ സമാനമായ പണപ്പെരുപ്പ ഉണ്ടായപ്പോൾ ഫെഡറൽ റിസർവ് പലിശനിരക്ക് 19.10 ആയിരുന്നു. നിലവിൽ ഇത് അര ശതമാനത്തിന് താഴെയാണ്.

ആഗോളതലത്തിൽ വിലക്കയറ്റം ഉണ്ടാകുന്നത് ഇറക്കുമതി ചെയ്യുന്ന വസ്‌തുക്കളുടെ വില ഉയരാൻ കാരണമാകും. കൂടാതെ നിലവിലെ പണനയം കർശനമാക്കുന്നതുൾപ്പടെ പലിശനിരക്കുകൾ മാറ്റുന്നതിനും കേന്ദ്രബാങ്കുകൾ നിർബന്ധിതരായേക്കും. അതിനാൽ ഇന്ത്യൻ സമ്പദ് വ്യവസ്ഥയെയും യുഎസ് വിലക്കയറ്റം ബാധിക്കും. രാജ്യത്ത് പലിശ നിരക്ക് വർധിപ്പിക്കാൻ ആർബിഐ തീരുമാനമുണ്ടാവുകയാണെങ്കിൽ അത് രാജ്യത്ത് വിലക്കയറ്റം കൂടുതൽ രൂക്ഷമാക്കിയേക്കും.